5 aqpanda Máskeýdiń bitim soty "ar-namysty qorlaý" baby boiynsha Aleksei Navalnyi ústinen qozǵalǵan is boiynsha sot tyńdaýyn qaita jalǵastyrdy. Oppozitsioner 94 jastaǵy soǵys ardageri Ignat Artemenkonyń "ar-namysyn qorlaý úshin" qasaqana túrde jalǵan aqparat taratty dep aiyptalyp otyr.
Buǵan deiin sot protsesi Navalnyidyń "Novichok" tobyna jatatyn ýmen ýlanyp, Germaniiaǵa jiberilýine bailanysty toqtap qalǵan.
TASS agenttigi juma kúni "basqa qylmystyq is boiynsha qamaýda bolǵan Aleksei Navalnyi sot otyrysyna jetkizildi" dep habarlady. Sot ǵimaraty mańynda qaýipsizdik kúsheigen.
Navalnyidyń ústinen qylmystyq is byltyr maýsym aiynda qozǵalǵan. Áleýmettik jelide Navalnyi Konstitýtsiiaǵa engiziletin túzetýlerdi qoldap, RT telearnasynyń úgit-nasihat videosyna túsken adamdardy "satqyn malailar" dep ataǵan. Tergeý organy ókilderiniń aitýynsha, bul sóz videoǵa túsken Artemenkonyń namysyna tigen. Hattamaǵa sáikes, Navalnyi jazbasyn oǵan saiajaidaǵy kórshisi habarlaǵan. Budan soń ol ózin qaraityn adamǵa jazbany kórsetýdi suraǵan. Artynsha ardagerdiń jaǵdaiy nasharlaǵan.
Navalnyi ózine taǵylǵan aiypty moiyndamaidy jáne qylmystyq istiń saiasilanǵanyn aitady.
Atalǵan bap boiynsha oppozitsioner million rýblge deiin aiyppul tóleýge nemese 240 saǵatqa deiin jumys isteýge mindettelýi múmkin.
2 aqpanda Máskeýdiń Simonovskii soty Aleksei Navalnyidy túrmege qamaý týraly úkim shyǵarǵan. Saiasatkerdiń 2014 jyly "Iv Roshe" isi boiynsha alǵan shartty jazasy 3,5 jyl túrme jazasymen almaastyryldy. Oppozitsionerdiń 2014 jyly birneshe ai úiqamaqta bolǵany eskerilgendikten ol túrmede 2 jyl 8 ai otyrýy tiis.
Navalnyi 17 qańtarda Berlinnen Máskeýge kelgennen keiin birden áýejaida ustalǵan. Ol Reseide "Novichok" ýymen ýlanǵannan keiin Germaniiada 5 ai emdelip, eline qaitqan bette ustaldy. Resei biligi ýlaný faktisin joqqa shyǵarady. Oǵan qatysty qylmystyq is qozǵalmady.
