3 jeltoqsanda Máskeý soty "memleketke satqyndyq jasady" dep kúdikke ilingen ǵalym Anatolii Gýbanovty eki aiǵa qamaý týraly sheshim shyǵardy. Bul aqparatty memlekettik TASS agenttigi habarlady.
Ǵalymǵa bultartpas sharasyn qoldaný týraly sot otyrysy jabyq ótken. Qylmystyq is materialdary qupiialandyrylǵan. "Interfaks" agenttiginiń boljamynsha, tergeý organdary Gýbanovty memlekettik qupiia dep tanylǵan málimetti shetel asyrǵan dep aiyptaýy múmkin.
Aqparat boiynsha, ǵalym Máskeý fizika-tehnikalyq institýtynda "aerodinamika jáne jyldam ushatyn apparattar" taqyrybynda lektsiia oqyǵan. Oqý ornynyń rektory Nikolai Kýdriavtsevtiń aitýynsha, Gýbanov institýtta "jarty stavkamen" jumys isteidi, al negizgi jumys orny - professor Jýkovskii atyndaǵy ortalyq aerogidrodinamika institýty. Máskeý fizika-tehnikalyq institýtynyń baspasóz qyzmeti ǵalymnyń jumys ornyna bailanysty túsinikteme berýden bas tartqan.
Aqparat quraldarynyń jazýynsha, Gýbanov Jýkovskii institýtynda 1979 jyldan beri jumys isteidi, ushaq, zymyran jáne ózge de jyldam ushatyn apparattardyń aerodiminamikasy máselelerimen ainalysady.
Qyrkúiek aiynyń sońynda Tomskide FSB-nyń Máskeý bólimshesiniń qyzmetkerleri elektrondy qurylǵylardy zariadtaityn quraldar shyǵarýmen ainalysatyn 65 jastaǵy Aleksandr Lýkanindi ustaǵan bolatyn. Ol "qupiia málimetterdi Qytaiǵa berdi" degen kúdikke ilingen. Ǵalym zeinetke shyqqannan keiin Qytai ýniversitetterinde sabaq bergen dep aitylady.
