Máskeý qylmystyq izdestirý jedel qyzmetkerleri Máskeý qalasy boiynsha Resei gvardiiasy Bas basqarmasy Jedel áreket etý jasaǵymen birlesip, iri kólemde alaiaqtyq jasady degen kúdiktilerdi ustady. Olardyń biri federaldyq izdeýde bolǵan. Bul týraly Máskeýdegi "Ult aqparat" TASS-qa silteme jasap habarlady.
BAQ-tyń málimeti boiynsha, ustalýshylardyń arasynda alaiaqtyǵy úshin izdeý jariialanǵan kásipker Jomart Ertaev ta bar. «Qazaqstandyq bankir izdeýde bolǵan. Ol «Moskva-Siti» ortalyǵyna jaqyn mańda ustaldy. Kásipkerdi biznes-ortalyqtaǵy kezdesýden Gelandwagen-men kele jatqan kezde ustaǵan. Ertaev alaiaqtyq jasady degen kúdikke ilindi», - delingen habarlamada.
Bankirdiń ustalǵany týraly REN TV telearnasy da habarlady.
«Keibir derekter boiynsha, ony buryn da ustamaq bolǵan. Alaida, onyń mekenjaiyn anyqtaý múmkin bolmaǵan. Sońǵy ýaqytta Ertaev iri TV kabel operatorlarynyń birin basqarǵan, sondai-aq kommertsiialyq bankke keńesshilik etken. Ol bul qylmystardy birneshe jyl buryn «Alians banktiń» top-menedjeri bolyp jumys istegen ýaqytta jasaǵan», - dep málim etti telearnada.
