17 maýsymda Reseide 17 262 adamnan koronavirýs anyqtaldy. Qańtar aiynan beri mundai joǵary kórsetkish tirkelmegen. Bir kúnde 453 adam qaitys bolǵan. Máskeýde 9 056 adamnan virýs shyqqan. Bul - indet bastalǵaly tirkelgen eń joǵary kórsetkish.
Qala meri Sergei Sobianin jaǵdaidyń nasharlaýyna bailanysty osy aptada engizgen shekteý sharalarynyń merzimin uzartty. Oǵan sáikes, qoǵamdyq tamaqtaný oryndary túngi 11 men tańǵy 6 arasynda jumys istei almaidy. Oiyn jáne sport alańdary, fýdkort, zooparkter jabyldy.
Máskeýde sonymen birge kópshilik sharalarǵa shekteý qoiyldy. Qoǵamdyq sharaǵa qatysatyndar myńnan aspaýy tiis.
"Biz bárine eskertkenbiz. Stadion, iri kontsert zaldarynda talaptardy oryndap, saq bolyńyzdarshy dedik. Aqyry ne boldy? Bi alańdarynda adamdar top-top bolyp, máz-meiram bilep júr. Men amalsyzdan muny jasaýǵa tiispin. Búginnen bastap qoǵamdyq sharalarǵa myńnan astam adam qatysa almaidy. Iaǵni, teatrlar men kinoteatrlar jumys istei beredi. Al kópshilik sharalardy ýaqytsha toqtatamyz. Bi alańdary men jankúierlerge arnalǵan fan-zonalardy jabýǵa týra keledi" dep jazdy Máskeý meri blogynda.
19-29 maýsym aralyǵynda Máskeýde synaq retinde "virýstan taza" meiramhana jáne dámhanalar jumys istei bastaidy. Mundai oryndarǵa koronavirýstyń tolyq eki dozasyn alǵan sertifikaty bar adamdar ǵana bara alady. Ǵimaratqa adamdardy QR-kodpen kirgizedi. Synaqqa 1500-2000 meiramhana qatysady.
- Forbes-tiń jazýynsha, Máskeý biligi qaitadan lokdaýn engizý múmkindigin qarastyryp jatyr, ázirge túpkilikti sheshim qabyldamaǵan. Bilik 20 maýsymnan bastap vaktsina almaǵandarǵa qatań shekteý engizýi múmkin, naqty sheshim koronavirýs statistikasy men vaktsinalanǵandar esebine qarai jáne biznes ókilderimen aqyldasqannan keiin qabyldanady.
- 16 maýsymda Máskeý jáne qala mańyndaǵy eldi mekenderde qyzmet kórsetý, bilim, kólik, turǵyn úi kommýnaldyq sharýashylyǵy, memlekettik qyzmetkerlerdiń keminde 60 paiyzy vaktsina alýǵa mindettelgen bolatyn.
- Densaýlyq saqtaý ministrligi "Spýtnik V" vaktsinasyn júkti áielder arasynda paidalanýǵa qatysty jańa derekterdi zerttep, olarǵa da ekpe egýge ruqsat etýi múmkin. Ministrlik "muny aiaǵy aýyr áielder arasynda koronavirýstyń aýyr túrine shaldyqqandardyń paida bolýymen" bailanystyrady.
- Azattyq
