Grigorii Rodchenkov, Máskeýdegi dopingke qarsy zerthananyń burynǵy direktory.
Resei birinshi ret jyldar boiy reseilik sportshylar - olimpiada chempiondarynyń doping qoldanǵanyn jasyryp kelgenin moiyndady. Bul týraly New York Times gazetinde jariialanǵan Reseidiń dopingke qarsy agenttigi direktorynyń mindetin atqarýshy Anna Antselovichtiń suhbatynda aitylady. Basylymnyń jazýynsha, Antselovich dopingti qoldaý baǵdarlamasyna Pýtinniń nemese onyń jaqyn adamdarynyń qatysy bar degen pikirdi joqqa shyǵardy.
Antselovich Batysta ótken jyldyń mamyrynan beri paida bolǵan aqparatty, ásirese Máskeýdegi dopingke qarsy zerthananyń burynǵy direktory, qazir AQSh-ta turatyn Grigorii Rodchenkov sportshylarǵa doping berdi jáne Sochi olimpiadasynda reseilik sportshylardyń doping tabylǵan synamalaryn joiǵan degen pikirdi rastady. Ol Federaldyq qaýipsizdik qyzmetiniń qyzmetkerleri olimpiadaǵa qatysqan Resei sportshylarynyń doping tabylǵan synamalaryn jasyryp, taza synamalarmen almastyryp qoiǵanyn, burynǵy sport ministriniń orynbasary Iýrii Nagornyidyń tanymal sportshylardyń tyiym salynǵan preparattardy qoldanǵanyn jasyrýǵa buiyrǵanyn rastady. Resei buǵan deiin munyń barlyǵyn teristep kelgen.
Dúniejúzilik dopingke qarsy agenttik (WADA) taǵaiyndaǵan komissiianyń basshysy Richard Maklaren Resei moiyndaý arqyly WADA-men bailanysyn qalpyna keltirýge tyrysyp jatyr deidi. WADA Máskeýden taiaýda júrgizgen tekserý qorytyndysymen kelisýdi talap etedi. Kelisken jaǵdaida ǵana Reseidiń dopingke qarsy qyzmetine doping test júrgizýge, al sport ministrligine elde halyqaralyq jarystar ótkizýge qaita ruqsat berilmek.
New York Times-qa bergen suhbatynda Reseidiń joǵary shendi sport sheneýnigi Vitalii Smirnov reseilik sportshylar jasyryn túrde doping qoldanbai batystyq sportshylarmen básekege túse almaitynyn aitqan. Onyń sózinshe, Batys elderiniń sportshylaryna meditsinalyq turǵydan anabolitikalyq steroidterdi qabyldaýǵa ruqsat etken WADA reseilikterdiń osyǵan uqsas preparattardy ashyq qoldanýyna ruqsat etpes edi.
"Azattyq"
