Máskeý meri Sergei Sobianin Resei astanasynda eńbek migranttarynyń 40 paiyzǵa azaiǵanyn habarlady. Sol sebepti jergilikti bilik Reseidiń ózge aimaqtarynan jumysshylar tartýǵa májbúr bolǵan.
Sobianin "kez kelgen máskeýliktiń qolyna kúrek, sypyrtqy nemese lom alyp, jumys isteýge daiyn emes" ekenin jetkizgen. Onyń sózine qaraǵanda koronavirýs indetine bailanysty shekara jabylyp, migranttar tapshylyǵynyń týyndaýy qala ómirine sózsiz áser etedi.
"Qiyndyq bolady. Qys kezinde Máskeýge "qara jumys" isteitin myńdaǵan adamnan quralǵan qosymsha otriadtar ýaqytsha jiberiletin" deidi ol.
Sobianin sonymen birge qurylys nysandarynda jumysshylar jetispei jatqanyn da atap ótken.
"Máskeýdegi qurylys alańdarynda isteitin jumysshylar kelip turatyn eldermen shekara jabyldy, ókinishke qarai olardyń ornyn Resei qurylysshylary basa almaidy" dedi ol.
Onyń aitýynsha, qazir qurylys nysandarynda ondaǵan myń jumysshy tapshy.
