Máskeý qalasy men oblysynda qyzmet kórsetý, transport, bilim, densaýlyq, mádeniet salasy qyzmetkerleri men sheneýnikterge koronavirýsqa qarsy vaktsinany mindettep salmaq. Resei astanasynda koronavirýs juqtyrǵandar kúrt kóbeiýine bailanysty jergilikti sanitarlyq mekemeler osyndai qaýly qabyldady.
Qaýlyǵa sáikes, jumys berýshiler 15 shildege deiin qyzmetkerlerine vaktsinanyń birinshi komponentin, al 15 tamyzǵa deiin ekinshisin salǵyzýy tiis.
Máskeý meri Sergei Sobianin qalada Covid indetiniń qaita órshigenin moiyndady.
Qazir Máskeý aýrýhanalarynda koronavirýs infektsiiasyn juqtyrǵan 12 myńnan astam naýqas jatyr. Aýyrǵandar sany jóninen Máskeý "byltyrǵy joǵary kórsetkishter deńgeiinde tur" dep jazdy Sobianin. Indetti tejeýdiń jalǵyz joly – ekpe degen ol jaqyn ýaqytta jappai vaktsina salýdy jedeldetý keregin aitty. "Bizdi durys túsinip, osy tym aýyr, kúrdeli, qajetti de jaýapty sheshimdi oryndaýǵa kómektesýdi suraimyn" dedi Máskeý meri.
Resei astanasyndaǵy Kommýnarka aýrýhanasynyń bas dárigeri Denis Protsenkonyń aitýynsha, qazir bul emdeý mekemesinde 400-den astam adam ókpe jeldetý apparatynda jatyr. Bul – buryn-sońdy bolmaǵan antirekord.
Resei prezidentiniń baspasóz hatshysy Dmitrii Peskov búkil el aýmaǵynda mindettep vaktsina saldyrý jospary joq ekenin aitty. Munyń aldynda prezident Vladimir Pýtin mindettep vaktsina saldyrýǵa bolmaitynyn eskertken.
Reseidiń kóp aýdanynda sońǵy aptalarda koronavirýspen aýyrǵandar kúrt kóbeidi. Bilik jurttyń jinalýyna tyiym salatyn shekteý sharalaryn qaita engizip jatyr.
16 maýsymda Reseide bir táýlikte virýs juqtyrǵan 13 397 adam tirkelse, 396 adam osy dertten kóz jumǵan.
Reseidegi vaktsinalaý qarqyny Eýropadaǵydan shamamen tórt ese baiaý. El azamattarynyń onnan biri ǵana vaktsinanyń keminde birinshi dozasyn salǵyzǵan.
