مەسكەۋ قالاسى مەن وبلىسىندا قىزمەت كٶرسەتۋ, ترانسپورت, بٸلٸم, دەنساۋلىق, مەدەنيەت سالاسى قىزمەتكەرلەرٸ مەن شەنەۋنٸكتەرگە كوروناۆيرۋسقا قارسى ۆاكتسينانى مٸندەتتەپ سالماق. رەسەي استاناسىندا كوروناۆيرۋس جۇقتىرعاندار كٷرت كٶبەيۋٸنە بايلانىستى جەرگٸلٸكتٸ سانيتارلىق مەكەمەلەر وسىنداي قاۋلى قابىلدادى.
قاۋلىعا سەيكەس, جۇمىس بەرۋشٸلەر 15 شٸلدەگە دەيٸن قىزمەتكەرلەرٸنە ۆاكتسينانىڭ بٸرٸنشٸ كومپونەنتٸن, ال 15 تامىزعا دەيٸن ەكٸنشٸسٸن سالعىزۋى تيٸس.
مەسكەۋ مەرٸ سەرگەي سوبيانين قالادا Covid ٸندەتٸنٸڭ قايتا ٶرشٸگەنٸن مويىندادى.
قازٸر مەسكەۋ اۋرۋحانالارىندا كوروناۆيرۋس ينفەكتسيياسىن جۇقتىرعان 12 مىڭنان استام ناۋقاس جاتىر. اۋىرعاندار سانى جٶنٸنەن مەسكەۋ "بىلتىرعى جوعارى كٶرسەتكٸشتەر دەڭگەيٸندە تۇر" دەپ جازدى سوبيانين. ٸندەتتٸ تەجەۋدٸڭ جالعىز جولى – ەكپە دەگەن ول جاقىن ۋاقىتتا جاپپاي ۆاكتسينا سالۋدى جەدەلدەتۋ كەرەگٸن ايتتى. "بٸزدٸ دۇرىس تٷسٸنٸپ, وسى تىم اۋىر, كٷردەلٸ, قاجەتتٸ دە جاۋاپتى شەشٸمدٸ ورىنداۋعا كٶمەكتەسۋدٸ سۇرايمىن" دەدٸ مەسكەۋ مەرٸ.
رەسەي استاناسىنداعى كوممۋناركا اۋرۋحاناسىنىڭ باس دەرٸگەرٸ دەنيس پروتسەنكونىڭ ايتۋىنشا, قازٸر بۇل ەمدەۋ مەكەمەسٸندە 400-دەن استام ادام ٶكپە جەلدەتۋ اپپاراتىندا جاتىر. بۇل – بۇرىن-سوڭدى بولماعان انتيرەكورد.
رەسەي پرەزيدەنتٸنٸڭ باسپاسٶز حاتشىسى دميتريي پەسكوۆ بٷكٸل ەل اۋماعىندا مٸندەتتەپ ۆاكتسينا سالدىرۋ جوسپارى جوق ەكەنٸن ايتتى. مۇنىڭ الدىندا پرەزيدەنت ۆلاديمير پۋتين مٸندەتتەپ ۆاكتسينا سالدىرۋعا بولمايتىنىن ەسكەرتكەن.
رەسەيدٸڭ كٶپ اۋدانىندا سوڭعى اپتالاردا كوروناۆيرۋسپەن اۋىرعاندار كٷرت كٶبەيدٸ. بيلٸك جۇرتتىڭ جينالۋىنا تىيىم سالاتىن شەكتەۋ شارالارىن قايتا ەنگٸزٸپ جاتىر.
16 ماۋسىمدا رەسەيدە بٸر تەۋلٸكتە ۆيرۋس جۇقتىرعان 13 397 ادام تٸركەلسە, 396 ادام وسى دەرتتەن كٶز جۇمعان.
رەسەيدەگٸ ۆاكتسينالاۋ قارقىنى ەۋروپاداعىدان شامامەن تٶرت ەسە باياۋ. ەل ازاماتتارىنىڭ وننان بٸرٸ عانا ۆاكتسينانىڭ كەمٸندە بٸرٸنشٸ دوزاسىن سالعىزعان.
