© Sputnik / Abzal Kaliev
Memleket basshysy Qasym-Jomart Toqaev M. V. Lomonosov atyndaǵy Máskeý memlekettik ýniversitetiniń Qazaqstan filialynyń 20 jyldyǵyna quttyqtaý lebizin joldady, dep habarlaidy QazAqparat.
Prezident quttyqtaýyn Qazaqstan Respýblikasynyń Memlekettik hatshysy Qyrymbek Kósherbaev oqyp berdi.
«Qurmetti jiyn qatysýshylary, sizderdi M. V. Lomonosov atyndaǵy Máskeý memlekettik ýniversitetiniń Qazaqstan filialynyń 20 jyldyǵymen quttyqtaimyn. Aitýly mereitoi halqymyz úshin tarihi mańyzy bar Táýelsizdiktiń 30 jyldyǵymen tuspa-tus kelip otyr. Zamanaýi bilim berý júiesiniń tiimdiligi biz júrip ótken úlken joldyń basty jetistikteriniń biri boldy. MMÝ filialy eki myńnan astam joǵary bilikti mamandardy daiarlap, otandyq ekonomikanyń, bilim men ǵylymnyń qalyptasýy men damýyna eleýli úles qosty. Filial qyzmeti Qazaqstan men Reseidiń jemisti gýmanitarlyq yntymaqtastyǵynyń jarqyn úlgisi bolyp sanalady», - deidi Prezident.
Memleket basshysy el Úkimeti M. V. Lomonosov atyndaǵy MMÝ filialyna jańa ǵimarat berýdi uiǵarǵanyn atap ótti.
«Meniń tapsyrmammen Úkimet filialǵa aýdany 13 myń sharshy metrden astam ǵimarat bóletinin atap ótken jón jáne Qazaqstan úshin basym mamandyqtar boiynsha joǵary bilikti kadrlar daiarlaý úshin tizim keńeitiledi dep úmittenemin. Bul oqý orny qos el arasyndaǵy dostyq pen seriktestikti odan ári nyǵaitýǵa, qazaqstandyq bilim berýdiń sapasy men básekege qabilettiligin arttyrýǵa yqpal eterine senimdimin. Saltanatty jiynǵa qatysýshylarǵa shyǵarmashylyq tabys, densaýlyq jáne amandyq tileimin!», - dedi Prezident Qasym-Jomart Toqaev.
Aita keteiik, M. V. Lomonosov atyndaǵy MMÝ Qazaqstan filialy QR Tuńǵysh Prezidenti - Elbasy Nursultan Nazarbaevtyń bastamasymen jáne RF prezidenti Vladimir Pýtinniń qoldaýymen qurylǵan.
2000 jylǵy 9 qazanda Resei Federatsiiasynyń Prezidenti V.V. Pýtinniń Qazaqstan Respýblikasyna jasaǵan memlekettik saparynda MMÝ rektory, akademik V.A. Sadovnichii men QR Bilim jáne ǵylym ministri Q.E.Kósherbaev Astana qalasynda L.N.Gýmilev atyndaǵy Eýraziialyq ulttyq ýniversitettiń bazasynda M.V. Lomonosov atyndaǵy Máskeý memlekettik ýniversitetiniń Qazaqstan filialyn qurý týraly hattamaǵa qol qoiǵan bolatyn.
