Soltústik Koreia basshysy Kim Chen Yn Reseidiń "Uly Otan soǵysyndaǵy Jeńiske 75 jyl" medalimen marapattaldy. Bul habardy Reseidiń Pheniandaǵy elshiligi taratty. Marapattaý rásimine Kim Chen Ynnyń ózi kelmegen. Medal Soltústik Koreia syrtqy ister ministri Li Son Gvonǵa tapsyrylǵan.
Medal "Soltústik Koreiada qaza bolǵan jáne jerlengen sovet jaýyngerlerin máńgi este qaldyrýǵa qosqan jeke úlesi úshin" jáne "sovet jaýyngerlerine qoiylǵan memorialdardy saqtaýǵa janashyrlyq tanytqany úshin" berilgen.
"Uly Otan soǵysyndaǵy Jeńiske 75 jyl" medaliniń qujaty boiynsha, shetel azamattaryna mundai medal Sovet áskeriniń nemese flotynyń quramynda, ne bolmasa Ekinshi dúniejúzilik soǵysqa partizan jasaqtarynyń quramynda soǵyssa ǵana beriledi. Kim Chen Ynnyń atasy – Soltústik Koreianyń máńgi prezidenti Kim Ir Sen partizan jasaǵynda bolǵan.
Kim Chen Yn Ekinshi dúniejúzilik soǵystyń aiaqtalýyna 75 jyl qurmetine mamyr aiynda Máskeýde ótetin paradqa shaqyrylǵan. Onyń kelisim bergeni nemese bermegeni jaily habarlanbaǵan, koronavirýs indetine bailanysty parad keiinge qaldyrylǵan.
Biyl, sáýir aiynda Soltústik Koreia basshysy Kim Chen Ynnyń jurt aldyna shyqpai ketkeni jaily habar taraǵan. 20 kúnnen keiin Koreia ortalyq aqparat agenttigi, 2 mamyrda Kim Chen Yn Phenian mańyndaǵy tyńaitqysh óndiretin zaýyt ashylýyna arnalǵan saltanatty sharaǵa qatysty dep jariialaǵan.
