Koronavirýs infektsiiasy jaily shý shyqqaly beri meditsinalyq maskany jappai satyp alyp, qymbatqa ótkizip jatqan alypsatarlarǵa qandai shara qoldanylady? OKQ-da ótken baspasóz máslihatynda bul suraq Densaýlyq saqtaý ministri Eljan Birtanovqa qoiyldy, dep habarlaidy QazAqparat.
«Meditsinalyq maska boiynsha otandyq óndirýshiler táýlik boiy jumys júrgizip jatyr. Maskalar eki baǵyt boiynsha óndirilýde: birinshiden meditsinalyq jáne sanitarlyq, politsiia jáne shekaralyq qyzmetkerlerge «SK-Farmatsiia» arqyly satyp alamyz. Ekinshiden jeke dárihanalarǵa maskalar distribiýtor arqyly jetkiziledi. Sonymen qazir karantinge jatqan azamattardyń sany kóbeigendikten, bizdiń meditsina salasyndaǵy maskalar men basqa da qurylǵylarǵa degen qajettilik kóterilip keledi. Biz zaýyttardan maskalardy alamyz. Qalǵandary dárihanalarǵa jóneltilýde», - dedi Eljan Birtanov OKQ-da ótken baspasóz máslihatynda.
Ministrdiń aitýynsha meditsinalyq maska boiynsha jumysty úilestiretin arnaiy shtab ta qurylǵan.
«Qai qalada tapshylyq joǵary, sol jaqqa jiberip jatyrmyz. Qazir búkil zaýyttar táýlik boiy jumys isteýde. Tapshylyq bolsa da, ol uzaqqa barmaidy dep senemiz. Kóp jaǵdai halyqtyń túsinigine bailanysty. Dárihanalarǵa salsaq, qazir bárin satyp alady. Odan keiin aýrýhanalarda naýqastardy qalai emdeimiz? Meditsinalyq qyzmetkerlerde sondai qorǵaý quraldary bolmasa infektsiia tez taraidy. Sondyqtan eń birinshiden meditsinalyq qyzmetkerlerge, patsientter jatqan aýrýhanalarǵa maskalar kerek», - dedi ol.
Eljan Birtanov óz sózinde infektsiia bolmasa maskany taǵýdyń qajeti joqtyǵyn taǵy da eske saldy.
«Olardyń da (alypsatarlardyń – avt.) máselesi belgili. Keshe de, búgin de quqyq qorǵaý organdaryna arnaiy tapsyrma berildi. Mysaly keden organdaryna da tiisti júktemeler berilip otyr. Shekara qyzmetkerleri kóp kómektesýde. Kontrabanda bolsa toqtatyp, ustap, tiisti aqparattardy bizge joldaidy. Jalpy bizdiń negizgi maqsatymyz – eksportqa jibermei, búkil maskany dárihanalarǵa taratý», - dedi ol.
