Almatyda ótken baspasóz máslihaty barysynda qalalyq Taýarlar men qyzmetterdiń qaýipsizdigi men sapasyn qadaǵalaý departamentiniń ókilderi men Qoǵamdyq densaýlyqty saqtaý basqarmasynyń basshysy maska tapshylyǵyna qatysty pikir bildirdi, dep habarlaidy QazAqparat.
«Búginde maskalardyń qory shynymen az. Biraq az bolsa da bar. Kún saiyn aptekalarǵa qońyraý shalyp, maskalardyń bar-joǵyn anyqtap jatyrmyz. Tasymaldaýshylar men óndirýshilerden maǵlumat alyp turamyz. Maska tapshylyǵyn halyq ózi týdyrdy. Shyn máninde maskany aýyrǵan adam ózgelerge juqtyrmas úshin taǵýy tiis bolatyn», - dedi departament basshysynyń orynbasary Ásel Halyqova.
Onyń aitýynsha, eki apta buryn maskanyń qunyn qadaǵalaý týraly memorandýmǵa qol qoiylǵan. Biraq kesheli beri monitoring jumystary toqtatyldy.
«Maskalardyń óndirisi, jetkizilýi, satylýynda jaǵdai máz emes bolǵan soń memorandým toqtatyldy», - dedi Ásel Halyqova.
Qalalyq Qoǵamdyq densaýlyqty saqtaý basqarmasynyń basshysy Tileýhan Ábildaevtyń aitýynsha, maskalardyń tapshylyǵyn boldyrmaý baǵytyndaǵy jumystar QR DSM tarapynan qolǵa alynyp jatyr.
«Úkimettik vedomstvoaralyq komissiianyń deńgeiinde maska óndirýshileriniń óndirisin arttyrý úshin jumys atqarylyp jatyr. Olardyń múmkindigin keńeitý úshin shikizat jetkizý máselesi qolǵa alyndy. Osy sharalardyń arqasynda jekemenshik aptekalarǵa jetkiziletin maskalardyń sany artady dep oilaimyz», - dedi Ábildaev.
Munyń aldynda qalalyq Qoǵamdyq densaýlyqty saqtaý basqarmasynyń basshysy Tileýhan Ábildaev koronavirýs juqpasynyń ahýaly týraly aitqan bolatyn.
Aita ketý kerek , álemde koronavirýs juqtyrǵandar sany 90 myńnan asty.
Bul týraly Dúniejúzilik densaýlyq saqtaý uiymynyń basshysy Tedros Gebrees málim etti.
Qazirgi ýaqytta álemde COVID-19 virýsyn juqtyrǵandar sany 90 893 adam jáne odan 3110 adam qaitys boldy.
Sońǵy 48 saǵatta Qytaidan tysqary jerde tirkelgen 1848 naýqastyń 80%-y úsh elge tiesili: Iran, Italiia jáne Ońtústik Koreia.
