Atyraý qalasy áýejaiyndaǵy jelilik politsiia bólimshesine «Qazaq Air» AQ áýekompaniiasynyń ókilinen «Atyraý-Aqtaý» baǵytyndaǵy ushaqqa otyrǵyzý kezinde tártip buzǵan jolaýshy anyqtalǵany týraly habarlama túsken, dep habarlaidy "Ult aqparat" kóliktegi politsiia departamentiniń baspasóz qyzmetine silteme jasap.
Kóliktegi politsiia departamenti basshysynyń birinshi orynbasary Qalijan Qoblandinniń habarlaýynsha, tekseris kezinde politseiler komandir men ekipaj músheleriniń aitqanyn oryndamai, maska taǵýdan bas tartyp karantin erejesin buzǵan 60 jastaǵy Aqtóbe qalasynyń turǵynyn anyqtady.
Saraptama barysynda azamattyń ishimdik ishkeni anyqtaldy. Tártipke baǵynbaǵan jolaýshyny ushaqtan túsirip tastady.
«Tártip buzýshyǵa qatysty QR ÁQBtK- niń 440-babynyń 1-bóligi (alkogoldik ishimdikterdi ishý nemese qoǵamdyq oryndarǵa masań kúide kelý) jáne QR ÁQBtK-niń 566-baby (ushaqta ózin-ózi ustaý erejelerin buzý) boiynsha ákimshilik hattama toltyrylyp, 8 AEK (22 224 teńge-red.) kóleminde aiyppul salyndy», - dedi politsiia polkovnigi.
Sondai-aq jolaýshyǵa qatysty QR ÁQBtK-niń 425-baby (Halyqtyń sanitarlyq-epidemiologiialyq salaýattylyǵy salasyndaǵy zańnama talaptaryn, sondai-aq gigienalyq normativterdi buzý) boiynsha ákimshilik hattama toltyrylyp, ol Atyraý bólimshelik kóliktegi taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
