Koronavirýs infektsiiasynyń yqtimal jańa tolqynynyń bastalýyna bailanysty mamandar almatylyqtarǵa maska taǵýdyń mańyzdylyǵy týraly taǵy da eskertti, dep habarlaidy QazAqparat.
«Qoǵamdyq oryndarda, adamdar kóp ótetin kóshelerde, sonyń ishinde qoǵamdyq kólikte betperde taǵý virýstyń aýamen taralýyna jol bermeidi. Ózderińiz biletindei, adamdar koronavirýs infektsiiasymen simptomsyz aýyrýy múmkin jáne bul týraly bilmesten, qoǵamdyq oryndarda maskalardy qoldanbai júrgen jaǵdaida basqalarǵa juqtyrý qaýpin týdyrady. Árine, tyǵyz bailanysta nemese bir bólmede uzaq ýaqyt bolǵan kezde maskalar virýstardan kepildendirilgen qorǵaýdy qamtamasyz etpeidi, biraq bul yqtimaldyǵyn aitarlyqtai tómendetedi. Al barlyq adamdardyń maskalardy qoldanýy virýsty juqtyrý qaýpin 90% -ke deiin tómendetedi»,-dedi Almaty qalasy taýarlar men qyzmetterdiń sapasy men qaýipsizdigin baqylaý departamenti basshysynyń orynbasary, dáriger-epidemiolog Ásel Qalyqova.
Buǵan deiin Almaty qalasynyń óńirlik kommýnikatsiialar qyzmetiniń alańynda ótken onlain-suhbat barysynda Qazaqstannyń Profilaktikalyq meditsina akademiiasynyń prezidenti Almaz Sharman maska taǵý pandemiianyń ekinshi tolqynynyń qýatyn aitarlyqtai tómendetýi múmkin ekenin atap ótken bolatyn. Sondai-aq, ol COVID-19-ben aýyrǵan adamdarǵa aýrýdyń simptomdyq, simptomsyz aǵymyna qaramastan, betperde kiiýdi jáne qashyqtyqty saqtaýdy usyndy.
«Eger siz aýyryp júrmeseńiz de, virýs murynǵa nemese aýyzǵa túsip, bailanys arqyly odan ári taralýy múmkin. Saqtyq sharalaryn saqtai otyryp, siz ózińizdi ǵana emes, jaqyndaryńyz ben ainalańyzdaǵy adamdardy da qorǵaisyz. Bul jerde basqalardyń qaýipsizdigi týraly da sóz bolyp otyr. Sondyqtan men barlyǵyn saqtyq sharalaryn saqtaýdy jalǵastyrýǵa shaqyramyn», - dedi A.Sharman.
Sonymen qatar, sarapshylar maskalardy durys kiiý kerek ekenin aitady. Aýyzdy ǵana emes, muryndy da jabý kerek, óitkeni aýada qozǵalatyn virýstyń muryn men kózdiń shyryshty qabattaryna enýi yqtimaldyǵy joǵary.
