Maska taǵý kúndelikti ómirimizdegi mádenietke ainalýy tiis. Mundai pikirdi «Aman-saýlyq» qoǵamdyq qorynyń prezidenti Baqyt Túmenova bildirdi, dep habarlaidy QazAqparat.
«Karantin sharalarynyń kezeń-kezeńimen alynýy óte durys. Óitkeni sońǵy 2-4 aptanyń ishinde virýsqa shaldyǵý jaǵdaiy tómendep kele jatyr. Sondyqtan 17 tamyzdan qatańdatylǵan karantin sharalary birtindep alǵynǵanymen tolyqtai joiylmaidy. Muny túsinýimiz kerek. Koronavirýsqa áli tosqaýyl qoiylǵan joq. Elimizde de, álemde de tiylmai otyr. Demek, karantin alyndy dep toi-dýmandy bastaýǵa, maskany sheship tastaýǵa bolmaidy. Saqtyq, qaýipsizdik sharalarynyń barlyǵy da oryndalýy tiis. Jalpy, koronavirýs óte jymysqy aýrý. Alda ne bolaryn bilmeimiz, kúzde ekinshi tolqyny soǵady dep jatyrmyz. Mine, osyǵan orai karantin sharalaryn kezeń-kezeńmen alyp tastaǵanmen aldaǵy 1-2 apta jaǵdaidy jiti baqylaýda ustaý qajet. Eger indet qaita órshitin bolsa, onda karantin sharalary qaita qatańdatylatyndyǵy sózsiz. Oǵan da túsinistik tanytýymyz qajet. Óitkeni, buǵan deiin karantin sharalaryn jeńildetip edik, koronavirýs indetine shaldyqqandar sany kúrt artyp ketti. Adamdar maska taǵý, áleýmettik araqashyqtyq saqtaý erejelerin ustamady», - dedi ol.
Onyń atap ótýinshe, indet taraǵan kezde elimizdiń Densaýlyq saqtaý ministrligi koronavirýs juqtyrǵandar sany 3,5 myńnyń tóńireginde bolatyndyǵyn boljaǵan. Alaida, qazirgi ýaqytta indetke shaldyqqandar sany 100 myńnan asyp otyr. Al buǵan meditsina salasynyń mamandarymen qatar qoǵam, adamdardyń ózderi de kináli. Adamdardyń kináli bolý sebebi, olar dárigerdiń keńesine qulaq asqan joq.
«Menińshe, koronavirýstyń aýyr formasy jáne ólim-jitim jasy kelgen adamdardyń arasynda kóp boldy. Munyń sebebi nede? Olardyń jasy kelgendikpen be? Joq, olarda júrek, ókpe syndy aǵzalarynyń sozylmaly aýrýlary boldy. Endi olar osynaý karantin sharalarynyń kezeń-kezeńmen alynyp tastalýyna paidalanyp, densaýlyqtaryn shyńdaýy, artyq salmaqtarynan arylýy qajet. Durys tamaqtanyp, salaýatty ómir saltyn ustanýy, kúndelikti serýendep, jattyǵýlar jasaýy kerek. Buǵan qosa, shylym shegýden de bas tartqan abzal. Dúniejúzilik densaýlyq saqtaý uiymy kúzge qarai koronvirýs indetiniń ekinshi tolqyny bas kóteretindigin eskertip jatyr. Sondyqtan joǵaryda ataǵan aýrýlary bar adamdar daiyn bolýy tiis. Taǵy bir aitarym, maska taǵý kúndelikti ómirimizdegi mádenietke ainalýy tiis», - dedi Baqyt Túmenova.
Aita keteiik, osy aidyń 17 tamyzynan bastap barlyq óńirde saýda oiyn-saýyq ortalyqtary, saýda jelileri, jabyq bazarlar, sán salondary, shashtaraz, SPA ortalyqtar, kosmetologiialyq qyzmet kórsetetin kásipkerlik sýbektileriniń qyzmeti jandanady. Basseini joq fitnes ortalyqtar, basseini joq monshalar men saýnalar, bilim berý ortalyqtary, mektepke deiingi balalar mekemeleriniń kezekshi toptary, ashyq aýadaǵy attraktsiondar jumysyn bastaidy. Biraq, bul atalǵan sýbektilerdiń barlyǵy da meilinshe jartylai qýattylyqpen jumys istegeni durys. Tutynýshylardy toptap qabyldaýǵa bolmaidy. Sonymen qatar, jumys berýshiler úshin qyzmetkerlerdiń 80 paiyz qashyqtan eńbek etý erejesin saqtaýy usynylady. Bul rette karantin sharalary alynyp tastaldy dep erkinsýge bolmaidy. Sanitarlyq-epidemiologiialyq talaptardy qatań saqtap, maska taǵý, qoldy únemi sabyndap jýý, antiseptik paidalaný, qoǵamdyq oryndarda ara qashyqtyq ustaný qajet. Óitkeni, alda koronavirýstyń ekinshi tolqyny júrý qaýpi joǵary.
Jumys kúnderi karantindik sharalar jeńildegenmen, demalys kúnderi karantin tártibi qatań saqtalady. 65 jastan asqan azamattardyń kóshege shyǵýy shekteledi. Qoǵamdyq kólikterdiń qozǵalysy toqtaidy jáne demalys kúnderi jumysqa barýǵa tyiym salynady. Bul da koronavirýs indetiniń taralýyna jol bermeý úshin jasalyp otyrǵan májbúrli shara desek te bolady. Degenmen, senbi-jeksenbide azyq-túlik dúkenderi men dárihanalar jumysyn jalǵastyra beredi.
Al oiyn-saýyq, sport, otbasylyq, estelik, saltanatty jáne basqa da buqaralyq is-sharalardy ótkizýge, barlardyń, túngi jáne oiyn klýbtarynyń, karaoke, fýdkort, kinoteatrlardyń jáne balalar men eresekterge arnalǵan basqa da oiyn-saýyq oryndarynyń jumysyna, mádeniet nysandarynyń, mýzeilerdiń qyzmetine, konferentsiialar, kórmeler, forýmdar ótkizýge; basseinder, qalalyq jáne qoǵamdyq jaǵajailar, ashyq akvaparkterdiń, dini nysandardyń jumysyna tyiym bar.
