Foto: ERA/TASS
Amerikalyq kásipker Ilon Mask jasandy intellekt negizinde jumys isteitin jańa entsiklopediia – Grokipedia jobasyn tanystyrdy. Qazirgi ýaqytta onda 885 myńnan astam maqala bar, dep habarlady Business Insider.
Bul bastama Masktyń «Ýikipediiamen» aradaǵy redaktsiialyq saiasatqa bailanysty kelispeýshilikterinen keiin júzege asty.
Washington Post-tyń málimetinshe, Grokipedia.com saity iske qosylǵannan keiin birneshe saǵat boiy jumys istep turdy, biraq keibir qoldanýshylar alǵashqy minýttarda tehnikalyq qatelikter týraly habarlaǵan. Qazir sait jumys istep tur jáne oǵan Qazaqstannan da kirýge bolady. Portaldyń 0.1 nusqasynda tek bir izdeý jolaǵy bar: qoldanýshy suraǵyn engizse, júie avtomatty túrde uqsas suraqtar men jaýap nusqalaryn usynady.
xAI kompaniiasy Grokipedia jobasyn ázirlep jatqanyn Mask qyrkúiek aiynda habarlaǵan bolatyn. Ol «Ýikipediiany» birjaqty redaktsiialyq saiasaty úshin jii synǵa alady.
Masktyń «Ýikipediiaǵa» narazylyǵy ótken jyly bastaldy. Sol kezde NewsGuard kompaniiasy onyń áleýmettik jelisin «Izrail men HAMAS arasyndaǵy qaqtyǵys týraly dezinformatsiianyń basty taratý kózi» dep ataǵan edi. Sarapshylar bul jaǵdaidy Mask satyp alǵannan keiin «kók belgilerdiń» (tekserilgen akkaýnttar belgisi) satylymǵa shyǵýymen bailanystyrǵan. Osy múmkindikti jalǵan aqparat taratatyn akkaýnttar paidalanyp, ózderin senimdi derekkóz retinde kórsetken.
Aita ketsek, NewsGuard keńesshileriniń qatarynda «Ýikipediianyń» negizin qalaýshy Djimmi Ýeils bar. Ol buǵan deiin de Maskty synaǵan. Máselen, 2023 jylǵy mamyrda Túrkiiada prezidenttik sailaý kezinde H áleýmettik jelisi túrik biliginiń talabymen oppozitsiialyq saiasatkerlerdiń akkaýnttaryn óshirse, «Ýikipediia» mundai qadamǵa barmaǵan.
Grokipedia ataýy Grok sózinen shyqqan. Bul – Masktyń 2023 jyly naýryzda qurǵan xAI kompaniiasynyń jasandy intellektke negizdelgen kómekshisi men chat-botynyń ataýy. Grok mátin men sýret generatsiialai alady jáne ChatGPT sekildi paidalanýshymen dialog júrgizedi. Sondai-aq ol internet pen H platformasy arqyly naqty ýaqyttaǵy aqparatqa qol jetkize alady.
Grok chat-boty qazirgi tańda H áleýmettik jelisiniń premiým jazylýshylaryna, sondai-aq jeke sait pen xAI portaly arqyly qoljetimdi.
Grokipedia da sol júie siiaqty jasandy intellekt negizinde jumys isteidi. Alaida onyń basty aiyrmashylyǵy — maqalalardy adamdar emes, Grok algoritmderi jazady.
