Belgili telejúrgizýshi Dana Nurjigittiń uly Álim anasynyń “Kóleńke” kitabynyń tusaýkeserinde sóz sóilep, otbasy basynan ótkergen aýyr kezeńdi eske aldy, dep habarlaidy ult.kz.
Kitaptyń tanystyrylymynda Álim anasyna júrekjardy tilegin arnap, onyń jańa týyndysynyń qoǵam úshin mańyzy zor ekenin atap ótti.
Ol “Kóleńke” kitabyn jai ǵana shyǵarma emes, stalking máselesine tap bolǵan adamdarǵa baǵyt-baǵdar beretin eńbek dep baǵalady.
“Eń aldymen óz anamdy quttyqtaǵym keledi. Anam ekeýmiz kórgen qiyndyqty jaýyma da tilemeimin. Bul bilim týraly kitap emes, bul – instrýktsiia. Stalking – áleýmettik másele. Mundai jaǵdaidy tek anam ekeýmiz ǵana bastan ótkergen joqpyz. Qazaqstanda mundai oqiǵalar kóp”, – dedi Álim.
Osylaisha, telejúrgizýshiniń uly anasynyń basynan ótken jaǵdaidyń bir otbasynyń ǵana máselesi emes ekenin jetkizip, qoǵam nazaryn stalkingtiń zardaptaryna aýdardy.
Aita keteiik, Dana Nurjigit buǵan deiin ekinshi ret turmys qurýdy josparlaǵan kezeńde stalkingke tap bolǵanyn málimdegen edi.
Telejúrgizýshiniń “Kóleńke” atty kitaby osy taqyrypty kóterip, adamnyń jeke shekarasyn buzý, qýdalaý jáne onyń saldary týraly qoǵamda ashyq áńgime qozǵaýdy maqsat etedi.
Eske sala keteiik, buǵan deiin Dana Nurjigit alǵashqy nekesi men ulyna qatysty jeke ómirindegi jaittardy ashyq aityp bergen edi.
