Sońǵy 10 jyl ishinde UQK terrorlyq sipattaǵy 100 shaqty zorlyq-zombylyq aktsiiasynyń aldyn aldy. «Egemen Qazaqstan» gazetindegi maqalasynda Qazaqstan Respýblikasy UQK tóraǵasy Kárim Másimov osylai jazdy, dep habarlaidy "Ult aqparat".
«15 jyl buryn Memleket basshysy UQK-ge kelip, onda arnaiy qyzmet jumysy qalai qurylýy kerektigi týraly óziniń kózqarasy men basymdyqtaryn belgilep berdi», dep jazady QR Ulttyq qaýipsizdik komitetiniń tóraǵasy.
Tóraǵanyń aitýynsha, Memleket basshysynyń strategiiasyna sai UQK, ózge de memlekettik organdarmen birge, ishki saiasi turaqtylyqty, ultaralyq jáne konfessiiaaralyq kelisimdi saqtaýdy qamtamasyz etip otyr. «Búginde Qazaqstan men UQK organdary alǵash ret halyqaralyq terrorizm jáne dini ekstremizm sekildi qubylystarmen betpe-bet keldi. Biz atalǵan toptarmen kúreste joldastarymyzdyń ómirlerin qurban etip, asa aýyr sabaq aldyq.
Sol joly Prezident naqty tapsyrma - qazaqstandyqtardy osy qaýip-qaterlerden qorǵaý týraly mindet qoidy. Qysqa merzim ishinde UQK organdary durys qorytyndylar jasap, jaǵdaidy baqylaýlaryna aldy. Elimizde terrorlyq infraqurylymdar qurý áreketi júzege asyrylmai tastalsa, birqatar lańkestikterge daiyndyqtyń joly kesildi. Sońǵy 10 jyl ishinde ǵana UQK-niń terrorizmge qarsy qyzmeti terrorlyq sipattaǵy 100 shaqty zorlyq-zombylyq aktsiiasynyń aldyn aldy. Halyqaralyq terrorlyq uiymdardyń Qazaqstanǵa qarai umtylystary joqqa shyǵaryldy. Kúrdeliligi jaǵynan biregei operatsiialar júzege asyrylyp, «Ortalyq Aziia modjahetteriniń jamaaty», «Djýnd-ál-Halifat», «Hizb-ýt-Tahrir» jáne basqa da qurylymdar joiyp jiberildi. Áriptes arnaiy qyzmettermen birge ondaǵan terrorshylar men ekstremister izdep tabylyp, ekstraditsiialandy», - dep jazdy Kárim Másimov.
Osy operatsiialarǵa 160-tan astam antiterrorlyq jáne jedel-áskeri sharalar ótkizgen arnaiy maqsattaǵy «A» qyzmetiniń qyzmetkerleri úlken úles qosqan. «Olardyń kópshiligi batyldyq pen batyrlyqtyń eren úlgisin kórsetkenderi úshin memlekettik nagradalarǵa ie bolsa, ókinishke qarai, keibireýleri opat boldy. Qazir arnaiy maqsattaǵy «A» qyzmeti eń zamanaýi qarý-jaraq, ekipirovka jáne tehnika úlgilerimen jaraqtanǵan joǵary kásibi bólimshe bolyp tabylady. Onyń jaýyngerleri - arnaiy qyzmettiń súzgisinen ótken betke ustarlary deýimiz kerek. Olar kún demei, tún demei asa kúrdeli áskeri mindetterdi sheshýge qabiletti. Muny 2016 jyldyń jeltoqsan aiynda atalǵan qyzmette bolǵan kezinde Memleket basshysynyń ózi erekshe atap kórsetti. Sol joly Elbasy «A» qyzmetiniń jeke quramymen áńgime-dúken quryp, bólimsheniń materialdyq-tehnikalyq bazasymen tanysqan bolatyn», - delingen maqalada.
Prezidenttiń ókimimen 20 jyl buryn terrorizm qateriniń óse túsip otyrǵany eskerile kelip, Qazaqstan Respýblikasynyń vedomstvoaralyq Antiterrorlyq ortalyǵy (ATO) quryldy.
