Búgin «Nur Otan» partiiasy Saiasi keńesiniń keńeitilgen otyrysynda biýro quramynda ózgerister oryn aldy, dep habarlaidy "Ult aqparat" QazAqparat agenttigine silteme jasap.
«Partiia Jarǵysyna sáikes eger partiia múshesi quqyq qorǵaý organdaryna aýysatyn bolsa, onda ol partiiadan shyǵarylady. Sondyqtan Másimov UQK tóraǵasy bolyp taǵaiyndalǵannan keiin Biýro quramynan shyǵaryldy. Onyń ornyna Jaqsybekov qosylyp, kandidatýrasyn saiasi keńes músheleri biraýyzdan qoldady», - dedi otyrystan keiin BAQ ókilderine suhbat bergen «Nur Otan» partiiasynyń hatshysy Qanybek Jumashev.
Sonymen qatar ol Saiasi Biýro quramynan QR Premer-Ministriniń orynbasary-Aýyl sharýashylyǵy ministri Asqar Myrzahmetovtiń de shyǵarylǵandyǵyn aitty.
«Ol Úkimettegi jumysyna basa nazar aýdarýy tiis boldy. Sondyqtan biýro quramynan shyǵaryldy. Biraq, Saiasi Keńeste qalady», - dedi ol.
Qanybek Jumashev BAQ ókilderiniń Kárim Másimov «Nur Otan» partiiasynyń múshesi bolyp qala bere me degen saýalyna dál qazirgi ýaqytta jaýap bere almaityndyǵyn aitty. «Ony qazir tekserý qajet. Bizde partiia músheleriniń arnaiy bazasy bar. Bul bazany árbir bastapqy partiialyq uiym qadaǵalap otyrady. Degenmen, onyń Saiasi biýro quramynan shyǵarylýy, onyń quqyq qorǵaý organdaryna jumysqa aýysýy partiia qatarynan shyǵaryldy degendi bildirse kerek», - dedi partiia hatshysy.
Onyń dereginshe, partiianyń saiasi keńesine elimizdiń barlyq ókilderiniń ókilderinen jasaqtalǵan 100 adam múshe. Al saiasi biýroǵa atalǵan saiasi keńesten músheler sailanady.
