Foto: sauda.e-qazyna.kz
Kárim Másimovke tiesili bolǵan samýrai qylyshy aýktsionda 1,5 million teńgege satyldy. Buǵan deiin tergeý aiasynda tárkilenip, keiin aktivterdi basqarýǵa berilgen buiym 29 sáýir kúni elektrondy saýda alańynda jańa iesin tapty, dep habarlaidy Ult.kz.
Lot sipattamasyna sáikes, qylysh qynabymen birge usynylǵan. Júzi bolattan jasalǵan, boiynda tereń emes oiyq bar. Qynaby qara tústi materialmen qaptalǵan, al saby sur tústi metaldan jasalyp, relefti geometriialyq órnekpen bezendirilgen.
Baǵalaýshylardyń málimetinshe, qarýdyń jalpy jaǵdaiy jaqsy. Júzine «47911» degen sandar qashalǵan. Qylyshqa baǵalaý 2024 jyldyń jeltoqsan aiynda júrgizilgen.
Qujattarda onyń naryqtyq quny 542 719 teńge dep kórsetilgenimen, bastapqy aýktsiondyq baǵasy 379 904 teńgeden bastalǵan. Nátijesinde saýda barysynda baǵa ósip, qylysh 1 586 954 teńgege satyldy.
Saýda protsesi baǵany kóterý aýktsiony formatynda ótken: qatysýshylar belgilengen qadammen baǵany kezek-kezek arttyryp otyrǵan. Eń joǵary baǵa usynǵan qatysýshy jeńimpaz atandy. Baǵa QQS-syz kórsetilgen, al mámile rásimdelgen kezde oǵan 16 paiyz salyq qosylady.
Aita keteiik, 2025 jyldyń qarashasynda bul qylysh 542 719 teńgege satylǵanymen, satyp alýshy tólem jasaǵan joq, sondyqtan mámile kúshin joiǵan. Al 2026 jyldyń aqpan aiynda ol 3,4 million teńgeden astam somaǵa satylǵany da aitylǵanymen, bul kelisim de júzege aspaǵan bolýy múmkin.
