فوتو: sauda.e-qazyna.kz
كەرٸم مەسٸموۆكە تيەسٸلٸ بولعان سامۋراي قىلىشى اۋكتسيوندا 1,5 ميلليون تەڭگەگە ساتىلدى. بۇعان دەيٸن تەرگەۋ اياسىندا تەركٸلەنٸپ, كەيٸن اكتيۆتەردٸ باسقارۋعا بەرٸلگەن بۇيىم 29 سەۋٸر كٷنٸ ەلەكتروندى ساۋدا الاڭىندا جاڭا يەسٸن تاپتى, دەپ حابارلايدى Ult.kz.
لوت سيپاتتاماسىنا سەيكەس, قىلىش قىنابىمەن بٸرگە ۇسىنىلعان. جٷزٸ بولاتتان جاسالعان, بويىندا تەرەڭ ەمەس ويىق بار. قىنابى قارا تٷستٸ ماتەريالمەن قاپتالعان, ال سابى سۇر تٷستٸ مەتالدان جاسالىپ, رەلەفتٸ گەومەترييالىق ٶرنەكپەن بەزەندٸرٸلگەن.
باعالاۋشىلاردىڭ مەلٸمەتٸنشە, قارۋدىڭ جالپى جاعدايى جاقسى. جٷزٸنە «47911» دەگەن ساندار قاشالعان. قىلىشقا باعالاۋ 2024 جىلدىڭ جەلتوقسان ايىندا جٷرگٸزٸلگەن.
قۇجاتتاردا ونىڭ نارىقتىق قۇنى 542 719 تەڭگە دەپ كٶرسەتٸلگەنٸمەن, باستاپقى اۋكتسيوندىق باعاسى 379 904 تەڭگەدەن باستالعان. نەتيجەسٸندە ساۋدا بارىسىندا باعا ٶسٸپ, قىلىش 1 586 954 تەڭگەگە ساتىلدى.
ساۋدا پروتسەسٸ باعانى كٶتەرۋ اۋكتسيونى فورماتىندا ٶتكەن: قاتىسۋشىلار بەلگٸلەنگەن قاداممەن باعانى كەزەك-كەزەك ارتتىرىپ وتىرعان. ەڭ جوعارى باعا ۇسىنعان قاتىسۋشى جەڭٸمپاز اتاندى. باعا ققس-سىز كٶرسەتٸلگەن, ال مەمٸلە رەسٸمدەلگەن كەزدە وعان 16 پايىز سالىق قوسىلادى.
ايتا كەتەيٸك, 2025 جىلدىڭ قاراشاسىندا بۇل قىلىش 542 719 تەڭگەگە ساتىلعانىمەن, ساتىپ الۋشى تٶلەم جاساعان جوق, سوندىقتان مەمٸلە كٷشٸن جويعان. ال 2026 جىلدىڭ اقپان ايىندا ول 3,4 ميلليون تەڭگەدەن استام سوماعا ساتىلعانى دا ايتىلعانىمەن, بۇل كەلٸسٸم دە جٷزەگە اسپاعان بولۋى مٷمكٸن.
