Máshhúr Júsip, Musa Shormanuly jáne Buqar jyraý kesenelerin jalǵaityn jol qashan jóndeledi? Senatorlardyń bul saýalyna QR Premer-Ministri Asqar Mamin jazbasha jaýap berdi, dep habarlaidy "Ult aqparat".
«Úkimet Qazaqstan Respýblikasynyń týristendirý kartasynyń basym aýmaqtarynyń úzdik ondyǵyna kiretin Baianaýyl kýrorttyq aimaǵyn tanymal etý jáne ilgeriletý boiynsha turaqty jumys júrgizýde. Ózderińizge belgili, Máshhúr Júsip, Musa Shormanuly jáne Buqar jyraý kesenelerin jalǵaityn avtomobil jolynyń jalpy uzyndyǵy - 114 shaqyrym. Máshhúr Júsip kesenesinen Musa Shormanuly kesenesine deiingi avtomobil jolynyń uzyndyǵy 84, onyń ishinde asfalt tóselgeni 73 jáne qiyrshyq tas tóselgeni 11 shaqyrymdy quraidy. Biyl qiyrshyq tas tóselgen jerlerge asfaltbeton tósep, uzyndyǵy 11 shaqyrym ýchaskeni ortasha jóndeý josparlanǵan. Jobanyń jalpy quny - 365 mln teńge» delingen Premer-Ministrdiń jaýabynda.
Úkimet basshysy jaýabyndaǵy málimetke sáikes, respýblikalyq biýdjetti birinshi naqtylaý kezinde jobany iske asyrýǵa 124,3 mln teńge mólsherinde aldyn ala qarajat qoldaý tapty.
Sondai-aq Pavlodar oblysynyń ákimdigi jergilikti biýdjetten 241,3 mln teńge bólýdi josparlap otyr.
«Musa Shormanuly kesenesinen Imantai jáne Álima Sátbaevtar mazaryna deiingi (10 shaqyrym), odan ári Kemal Aqyshevtyń týǵan jerine deiingi (10 shaqyrym) jáne Buqar jyraý kesenesine deiingi (10 shaqyrym) avtomobil jolynyń uzyndyǵy 30 shaqyrymdy quraidy jáne jol tósemi joq. Búgingi kúni Pavlodar jáne Qaraǵandy oblystarynyń ákimdikteri joǵaryda kórsetilgen ýchaske qurylysyna jobalyq-smetalyq qujattamany ázirleýde. Ol osy jyldyń úshinshi toqsanynda aiaqtalmaq. QR Indýstriia jáne infraqurylymdyq damý ministrligi qurylys jáne turǵyn úi-kommýnaldyq sharýashylyq isteri komitetiniń «Memlekettik vedomstvoaralyq jobalardyń saraptamasy» respýblikalyq memlekettik kásipornynyń oń qorytyndysyn alǵannan keiin Úkimet joǵaryda kórsetilgen jobalardy qarjylandyrý máselesin qaraidy», - dep naqtylanǵan Asqar Maminniń jaýabynda.
