QR Sybailas jemqorlyqqa qarsy is-qimyl agenttigi jemqorlardyń kásipkerlikke qatty kedergi keltirip otyrǵanyna alańdaýshylyq bildirýde, dep habarlaidy QazAqparat.
«Kólik baqylaý inspektsiiasynda qylmystyq shemalardy áshkereleý jalǵasýda. Mysaly, Almaty oblysynda osy vedomstvo basshysynyń orynbasary Janturov júieli negizde júk avtokóliginiń kedergisiz ótkizý úshin 50 myńnan 240 myń teńgege deiingi somada zańsyz syiaqy alyp kelgen (sot sheshimimen 99 mln teńge aiyppul tóleýge mindetteldi)», - deidi agenttiktiń asa mańyzdy ister jónindegi tergeýshisi Daniiar Bekaidarov onlain baspasóz máslihatynda.
Onyń aitýynsha, keibir laýazymdy qyzmetkerler kásipkerlik qyzmetke barynsha kedergi keltiredi. «Máseleni sheshemin» degen jeleýmen qamqorlyqqa alǵan bolyp kásipkerlerden para alady.
«Máselen, Pavlodar oblysynda oblystyq TJD Órt qaýipsizdigin baqylaý basqarmasynyń bastyǵy podpolkovnik Iskakov sottaldy. Ol órt qaýipsizdigin tekserý barysynda anyqtalǵan buzýshylyqtar boiynsha sharalar qabyldamaý úshin saýda úiiniń ókilinen 500 myń teńge mólsherinde para alǵan (5 mln teńge mólsherinde aiyppulǵa ilikti)», - deidi ol.
Kásipkerlik qyzmetke zańsyz aralasý faktileri de tyiylar emes. Máselen, Almaty oblysynda «Almatyjollaboratoriia» RMM basshysy S. S. Kenjeǵulǵa para alǵany jáne kásipkerlik qyzmetke zańsyz qatysqany úshin 40 mln teńge kóleminde aiyppul salynǵan.
