Foto: Air Astana
23 qańtarda Parlament Májilisi janyndaǵy Qoǵamdyq palata otyrysynda aviatsiia salasyndaǵy máseleler talqylandy. Onda «M.Qozybaev atyndaǵy Soltústik Qazaqstan ýniversiteti» KEAQ Direktorlar keńesiniń tóraǵasy, Qoǵamdyq palatanyń tóraǵa orynbasary Ǵalym Baitoq áýe biletteriniń qymbatshylyǵy men reisterdiń tapshylyǵy bola tura aviakompaniia qyzmetkerleri men olardyń jaqyndaryna 80–90% jeńildik beriletin jabyq júie bar ekenin synǵa aldy, dep habarlaidy Ult.kz.Bul artyqshylyqtar memleket esebinen emes, tolyq baǵa tóleitin qarapaiym jolaýshylardyń qaltasynan ótelip otyr jáne salanyń ádildigine degen senimdi álsiretedi dep esepteidi Baitoq. Ol mundai jaǵdailar toqtatylyp, barshaǵa ortaq ashyq ári naqty erejeler engizilýi qajet ekenin alǵa tartady.
Foto: qaz-media.kz / Ǵalym Baitoq
"Aitpai ketýge bolmaidy, qymbat áýe biletteri, reister tapshylyǵy jáne jolaýshylarǵa «naryqtyq ekonomika» týraly úzdiksiz aitylatyn áńgimeler aiasynda aviatsiia salasynda áli kúnge deiin aviakompaniia qyzmetkerleri men olardyń jaqyn ainalasyndaǵy adamdardyń 80–90 paiyzǵa deiingi orasan jeńildikpen ushýy áli bar.
Joǵary menedjmenttiń týystary jeńildetilgen biletterdi paidalanǵanyna qatysty jariia janjaldardan keiin másele bir ǵana adamda nemese bir ǵana jaǵdaida emes ekeni aiqyn boldy. Bul — júieli problema. «Óz adamdaryna arnalǵan arzan biletter» memleket tarapynan sýbsidiialanbaidy, ári joq jerden paida bolmaidy — olar tolyq baǵa tóleitin qarapaiym jolaýshylardyń esebinen óteledi. Kóp jaǵdaida bul jolaýshylarda bilet qaitarý quqyǵy da joq, qyzmet kórsetý deńgeii tómen, balama tańdaý da qarastyrylmaǵan.
Nátijesinde azamattarǵa naryq pen shyǵyndar týraly túsindirilip jatqanymen, júieniń ishinde jabyq artyqshylyqtar klýby jumys istep turǵanyn kórip otyrmyz. Bul salanyń ózine degen senimdi álsiretedi jáne qatań ashyqtyq pen naqty erejelerdi talap etedi — ne barlyǵyna birdei, ne eshkimge de joq", - dedi Ǵ. Baitoq óz baiandamasynda.
Jeńildetilgen biletter daýy jáne sot sheshimi
Osy oraida eske salsaq, 2024 jyldyń sońynda Air Astana júrgizgen ishki aýdit iri kólemdegi qarjylyq jetispeýshilikti anyqtap, is quqyq qorǵaý organdaryna berildi. 2025 jyly kúdiktiler qamaýǵa alynyp, sot barysynda qorǵaý tarapy jeńildetilgen biletter júiesi bar ekenin alǵa tartqanymen, tergeý men sot bul ýájderdi negizsiz dep tanyp, 2026 jylǵy 15 qańtarda aiyptalýshylar Dáýir Erkenuly, Erkin Isanov jáne Renat Abýlhanov 1,1 mlrd teńge jymqyrdy dep 8,5–9 jylǵa bas bostandyǵynan aiyrýǵa úkim shyǵardy."Bul úkim quqyq buzýshylyqtar anyqtalǵan jáne quqyq qorǵaý organdaryna júginýge negiz bolǵan Air Astana ishki tekserýiniń qorytyndylaryn rastaidy.
Sot talqylaýy sheńberinde istiń barlyq mán-jaiy jan-jaqty qaraldy. Sot anyqtalǵan áreketter quqyqqa qarsy sipatta bolǵan qorytyndyǵa keldi. Buǵan deiin ǵalamtorda jariia bolǵan Renat Abýlhanov isiniń mán-jaiǵa sáikes kelmeitin túsiniktemeleri rastalǵan joq", - delingen Air Astana baspasóz qyzmeti taratqan habarlamada.
Air Astana basshysy Piter Fosterdiń jubaiy Tatiana Fosterge qatysty da jeńildetilgen aviabiletter tóńireginde daý týyndaǵan. Ol kúieýiniń laýazymyn paidalanyp, týystaryna jeńildikpen áýe biletterin satyp alǵany týraly aqparat tarady.
Ol 15 qańtardaǵy sot sheshiminen keiin óziniń Instagram paraqshasynda óz otbasyna qatysty aiyptaýlar «tarap ketken jalǵan aqparat» dep atap, sot sheshimin kútkenin málimdedi.
Foto: instagram.com/@Tatiana Foster
"Mundai jaǵdailarda kompaniiaǵa, onyń qyzmetkerlerine jáne úshinshi tulǵalarǵa !jalǵan! aiyptaýlar taǵý arqyly múddeli tarap óz pozitsiiasyn barlyq múmkin jolmen qorǵaýǵa tyrysady. Alaida sot protsesi men ishki jáne táýelsiz aýdit nátijeleri múldem basqa jaǵdaidy kórsetti. Mine, dál osy ishki aýdit kompaniiadaǵy mańyzdy !qarjylyq! zań buzýshylyqtardy anyqtap, olardyń sipaty men kólemine qatysty aýyr suraqtar týǵyzdy. Bul faktiler keiin táýelsiz aýditor tarapynan rastalyp, quqyqtyq baǵa men sot qaraýyna joldandy. Búgin bul másele túpkilikti sheshildi.", - dep jazdy Tatiana Foster.
Piter Foster 2026 jyldyń naýryz aiynyń sońynda Air Astana kompaniiasynyń bas atqarýshy direktory laýazymynan ketedi. Qarjy jónindegi atqarýshy direktor Ibrahim Janlyel osy kezeńde Bas atqarýshy direktor qyzmetine taǵaiyndalatyn bolady.
