Qordai aýdanyna qarasty Masanchi aýylynda qiraǵan úiindilerdiń astynan adam múrdesi tabyldy. Bul jaiynda Jambyl oblysy ákiminiń keńesshisi Qanat Qulshymanov Facebook paraqshasynda jazdy, dep habarlaidy "Ult aqparat".
«2020 jyldyń 11 aqpanynda saǵat 12:07-de Jambyl oblystyq politsiia departamentiniń kezekshi bólimine Qordai aýdanynyń Masanchi aýylynda saýda ortalyǵy ǵimaratyn (órtten keiin shatyry qulaǵan) tazartý kezinde qiraǵan úiindilerdiń astynan adamnyń órtengen múrdesi tabylǵandyǵy týraly aqparat tústi. Máiittiń jeke basyn anyqtaý úshin sot-meditsinalyq saraptama taǵaiyndaldy. Jedel aldyn-alý sharalary júrgizilýde», - dep jazdy ol.
Eske salaiyq , 7 aqpan kúni Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles boldy.
QR Prezidenti Qasym-Jomart Toqaev buzaqylyq sipattaǵy jappai tóbelesti aiyptap, arandatýshylar buny odan saiyn órshitkenin málimdedi.
Qazirgi ýaqytta Qordai aýdanyndaǵy oqiǵa bailanysty 25-ten astam qylmystyq is qozǵaldy.
