Shymkent qalasynyń áýejaiynda qoǵamdyq tártipti buzǵan mas jolaýshyǵa qatysty sotqa deiingi tergeý bastaldy. Sondai-aq ol aiyppul tóleýge mindetteldi, dep habarlaidy "Ult aqparat".
Kóliktegi politsiia departamentiniń bastyǵy Ońal Bekievtiń aitýynsha, keshe Shymkent qalasy áýejaiynyń qyzmetkeri politsiiaǵa habarlasyp, alkogolge mas jolaýshynyń kútý zalynda ózin dóreki ustap, bylapyt sóilep, qoǵamdyq tártipti buzǵanyn aitqan.
Oqiǵa ornyna jetken kóliktegi politsiia qyzmetkeri mas jolaýshyny sabyrǵa shaqyrýǵa tyrysqanymen, ol zańǵa qaishy áreketin tyimai, qoǵamdyq tártipti buzýyn jalǵastyrǵan. Buzaqy politseilerdiń zańdy talabyna baǵynbai, aiǵailap sóilep, bilik ókilderine balaǵat sózder aitqan. Tekserý barysynda quqyq buzýshynyń Túrkistan oblysynyń 37 jastaǵy turǵyny ekendigi anyqtalǵan.
«Atalǵan azamat politsiia bólimshesine jetkizilip, onyń ústinen QR Ákimshilik quqyq buzýshylyq týraly kodekstiń 440-baby 1-tarmaǵy, 434-baby 1-tarmaǵy, 667-baby 1-tarmaǵy boiynsha 3 ákimshilik hattama toltyryldy. QR Qylmystyq kodeksiniń 378-baby 1-bóligimen sotqa deiingi tergeý bastaldy», - dedi politsiia polkovnigi.
Meditsinalyq kýálandyrý qorytyndysyna sáikes, azamat alkogolge ortasha deńgeide mas bolǵany anyqtalyp otyr.
«Oǵan qoǵamdyq orynǵa alkogolge mas kúide kelý faktisimen 5 AEK mólsherinde aiyppul salyndy. Eki ákimshilik bapqa qatysty materialdar protsessýaldyq sheshim qabyldaý úshin Shymkent qalalalyq mamandandyrylǵan aýdanaralyq ákimshilik sotyna jiberildi. Sonymen qatar bilik ókilin balaǵattaý faktisimen tergeý amaldary júrgizilip jatyr», - dedi ol.
