Soltústik Qazaqstan oblysynyń qylmystyq ister jónindegi mamandandyrylǵan aýdanaralyq soty kámeletke tolmaǵan qyzdy toptasyp zorlaý isi boiynsha úkim shyǵardy, - dep habarlaidy Tengrinews.kz tilshisi "Astana" telearnasyna silteme jasap.
Oqiǵa byltyr Petropavldan 20 shaqyrym jerdegi "Berezovaia rosha" demalys ornynda bolǵan. Ishimdik ishken bes jigit 17 jastaǵy qyzdy jabylyp zorlaǵan. Politseilerge qylmys jaiynda jábirlenýshiniń anasy habarlaǵan bolatyn. Sot taraptardyń kelisimi boiynsha jabyq túrde ótti.
Olardy kináli dep tapqan sot 10 jyldan 17 jylǵa deiin bas bostandyǵynan aiyrý jazasyn taǵaiyndady. Buǵan qosa, sottalýshylar qyzǵa moraldyq ótemaqy tóleidi.
Sottalýshylardyń kinási jábirlenýshi men kýálardyń aiǵaqtarymen, jeke basyn anyqtaý hattamalarymen, saraptamalyq qorytyndylarmen jáne basqa da dáleldemelermen anyqtaldy.
"QR Qylmystyq kodeksiniń 120 jáne 121-babyna sáikes qylmysqa jol bergen 5 azamat 10 jyldan 17 jylǵa deiin bas bostandyǵynan aiyrylsyn. Onyń ekeýi kámelet jasqa tolmaǵandyqtan 10 jylǵa sottalady. Sondai-aq, sot jábirlenýshiniń 10 million teńge kólemindegi ótemaqysyn tolyq qanaǵattandyrdy", - úkimdi sýdia Sergei Viktorenko oqydy.
Sottalýshylar 10 million teńge kóleminde moraldyq shyǵyndy birlesken tártippen óteitin bolady. Tórteýi jazasyn qatań rejimdegi koloniiada óteidi. Sottalýshylar óz kinálaryn moiyndamady.
