Astanada Zeekr elektromobili men Yutong qalalyq avtobýsy soqtyǵysyp, tórt adam meditsinalyq mekemege jetkizildi, dep habarlaidy ult.kz.
Jol-kólik oqiǵasy 29 qyrkúiekte Máńgilik El dańǵyly men Hýsein ben Talal kósheleriniń qiylysynda bolǵan.
Astana qalasy Politsiia departamentiniń málimetinshe, Zeekr júrgizýshisi Qabanbai batyr dańǵyly jaǵynan kele jatyp, baǵdarshamnyń ruqsat beretin belgisi janǵan kezde solǵa burylǵan. Alaida burylý kezinde qarsy baǵytta kele jatqan Yutong avtobýsyna jol bermegen.
Saldarynan eki kólik soqtyǵysqan.
Jol apatynan Zeekr júrgizýshisi men onyń jolaýshysy, sondai-aq avtobýstyń eki jolaýshysy zardap shegip, aýrýhanaǵa jetkizildi.
Zeekr avtokóligi kommýnaldyq turaqqa qoiyldy.
Politsiia jol-kólik oqiǵasynyń mán-jaiyn anyqtap jatyr.
