Oral qalasynyń turǵyny qaitys bolǵan ákesine meditsinalyq kómektiń der kezinde kórsetilmegeni úshin qalalyq aýrýhanadan 4 million teńge kóleminde moraldyq ótemaqy óndirip aldy. Sot meditsinalyq kómektiń keshiktirilýi naýqastyń ómirin saqtap qalý múmkindiginen aiyrǵan degen qorytyndyǵa keldi, dep habarlaidy ult.kz.
Joǵary sottyń málimetinshe, 58 jastaǵy er adam keiin jansaqtaý bóliminde kóz jumǵan. Uly ákesiniń óliminen keiin politsiiaǵa aryzdanǵanymen, qylmystyq quqyq buzýshylyq belgileri anyqtalmaǵandyqtan sotqa deiingi tergeý toqtatylǵan.
Alaida Densaýlyq saqtaý ministrligi Meditsinalyq jáne farmatsevtikalyq baqylaý komiteti departamenti júrgizgen tekserý barysynda naýqasqa meditsinalyq kómek kórsetý kezinde birqatar zańbuzýshylyqqa jol berilgeni anyqtalǵan.
Marqumnyń uly meditsina qyzmetkerleriniń áreketi men áreketsizdigi ákesiniń ólimine sebep boldy dep eseptep, aýrýhana men emdeýshi dárigerden moraldyq ziian óndirýdi talap etip sotqa júgingen.
Oral qalasynyń №2 soty naýqastyń birneshe ret meditsinalyq kómekke júgingenine qaramastan, dárigerler ony mas kúiinde dep boljap, qajetti tekserýden ótkizbegenin anyqtady.
Sot málimetinshe, naýqastyń aǵzasyndaǵy alkogol mólsherin anyqtaityn eshqandai zertteý júrgizilmegen. Tek Densaýlyq saqtaý basqarmasynyń call-ortalyǵyna shaǵym túskennen keiin ǵana er adam terapiia bólimine jatqyzylyp, oǵan ishemiialyq insýlt diagnozy qoiylǵan. Alaida em bastalǵanymen, kelesi kúni naýqas kóz jumǵan.
Aýrýhana ókili talap aryzben kelispegen. Al prokýror talapty ishinara qanaǵattandyrýdy suraǵan.
Is materialdaryn saralaǵan sot meditsinalyq kómektiń kesh kórsetilýi naýqastyń ómirin saqtap qalý múmkindigin azaitqan degen qorytyndyǵa keldi.
Sot sondai-aq ákesinen aiyrylǵan talapkerdiń aýyr moraldyq kúizeliske túskenin, al meditsina qyzmetkerleri jibergen zańbuzýshylyqtar onyń ádiletsizdik sezimin kúsheitkenin atap ótti.
Nátijesinde talap aryz ishinara qanaǵattandyrylyp, qalalyq aýrýhanadan talapkerdiń paidasyna 4 million teńge kóleminde moraldyq ziian ótemaqysy óndirildi.
Sot sheshimi zańdy kúshine endi.
