Aqmola oblysynyń ákimi Ermek Marjyqpaev Shortandy aýdanynyń Shortandy aýylynda gaz jaralysynan qaitys bolǵandardyń otbasyna barynsha kómek kórsetýdi tapsyrdy, dep habarlaidy QazAqparat.
Oblys ákimi jarylys bola salasymen oqiǵa ornyna attanǵan bolatyn.
«Meniń tapsyrmammen tótenshe jaǵdaidy joiý jónindegi jedel shtab quryldy. Zardap shekkenderge psihologiialyq jáne materialdyq kómek kórsetilip jatyr. Qaza tapqandardy jerleý rásimine kómek kórsetiledi. Baspana máselesi sheshilgenshe jarylys bolǵan úi ielerine ýaqytsha baspana beriledi. Eshkim de nazardan tys qalmaidy», - dedi Ermek Marjyqpaev.
Óńir ákimi baspasóz qyzmetiniń habarlaýynsha, oblys basshysy aldymen Shortandy aýdandyq aýrýhanasyna bardy. Onda jarylystan zardap shekken 6 adamdy Nur-Sultandaǵy kúiik ortalyǵyna jetkizý máselesin sheshti. Zardap shekken taǵy 3 adamnyń jaǵdai turaqty bolǵandyqtan olar Shortandy aýdandyq aýrýhanasynda qaldy.
Ermek Marjyqpaev sonymen qatar, órttiń shyǵý sebebin muqiiat anyqtaýdy tapsyrdy. Oqiǵanyń sebep-saldaryn anyqtaý maqsatynda jedel-tergeý toby men órtti zertteý laboratoriiasy jumysyn bastady.
Keshirek Aqmola oblysy ákiminiń tóraǵalyǵymen ókiletti organ ókilderiniń qatysýymen jedel shtabtyń otyrysy ótti. Shtab jumysynyń aiasynda zardap shekkenderge kómek kórsetildi.
Qazirgi tańda jarylystan zardap shekken otbasylar týystarynyń úilerine ornalastyryldy. Sondai-aq olardyń keibireýine ýaqytsha baspana berilip, qaza tapqandardy jerleý rásimine kómek kórsetildi.
Oblystyq meshit janyndaǵy qairymdylyq qory qaza tapqandar men zardap shekkenderdiń otbasylaryna kómek uiymdastyrdy. Shortandy aýylynyń ákimdigi zardap shekkenderge birinshi kezekte qajetti zattardy qabyldap jatyr.
Aita keteiik, 16 qarasha kúni Aqmola oblysynyń Shortandy kentinde gaz ballony jarylyp, 3 adam kóz jumdy, taǵy on adam aýrýhanaǵa tústi.
Oqys oqiǵa túngi saǵat 22:00 shamasynda Shortandy kentinde Lineinaia kóshesi 28 meken-jaiy boiynsha ornalasqan úsh páterli turǵyn úide boldy. Gaz ballonynyń jarylýy saldarynan 3 páterli jeke úi órtenip, onyń bir bóligi qulady.
