Mariýpolde qorshaýda qalǵan ýkrain áskeri Resei qorǵanys ministrliginiń qarý-jaraqty tastap, tutqynǵa berilý talabyna moiynsunbaitynyn málimdegen. Bul týraly 17 sáýirde Ýkraina premer-ministri Denis Shmygal habarlady. Onyń sózinshe, Mariýpoldiń kei jerin ýkrain áskeri baqylaýda ustap otyr.
Buǵan deiin Resei "Azovstal" metallýrgiia kombinaty aýmaǵyna bekingen Ýkraina kúshteri qorshaýda qalǵan, shabýyl kezinde teńiz jaiaý áskeriniń 36-brigadasynyń komandiri, Ýkraina batyry Vladimir Baraniýk qaza tapqan dep habarlaǵan. Kiev ázirge bul aqparatty rastaǵan joq.
Resei áskeri men "Donetsk halyq respýblikasy" separatistik qurylymynyń kúshteri Mariýpoldi naýryzdyń basynda qorshap alǵan. Olar sodan beri ýkraindyq "Azov" batalony men ýkrainalyq teńiz jaiaý áskeriniń 36-brigadasynyń úsh myńǵa jýyq áskerinen "azat ettik" dep jatyr. Brigadanyń biraz sarbazy birneshe kún buryn tutqynǵa berilgeni týraly aqparat taraǵan.
Ýkraina biliginiń habarlaýynsha, Resei áskeriniń shabýylynan Mariýpoldegi ǵimarattardyń 90 paiyzy qiraǵan. Qansha beibit turǵyn qaza tapqanyn anyqtaý ázirshe múmkin emes, biraq kýágerler myńdaǵan adam mert bolǵan deidi.
