Diplomat, qoǵam qairatkeri, qazaq tiliniń úlken janashyry Sailaý Batyrsha-ulynyń memleket jáne qoǵam qairatkeri, qazir Qazaqstan Respýblikasy Prezident Ákimshiligi basshysynyń orynbasary Marat Tájin týraly estelik áńgimesi.
S.Batyrsha-uly: M.Tájin diplomatiia salasyna kelmei turyp, joǵary laýazymdy qyzmetter atqarǵanyn bilesizder. Túrli jiyn barysynda onyń resmi tilde kóp sóileitinin kórýshi edim. Sodan Syrtqy ister minsitri bolyp taǵaiyndaldy degendi estigende «ministrliktegi qazaq tili taǵy keri keteme eken» dep qaýiptendim. Biraq, jańa ministr meniń bul mazasyzdyǵymdy óz isimen aiyqtyra bastady. Ol jinalystarda taza qazaqsha sóilep, baiandamalarynyń denin qazaq tilinde jasai bastady.
Osyǵan orai men ministrge ózge elder úshin jazylatyn notalardy qazaq tilinde jazsaq degen usynysymdy bildirdim. Óitkeni, basqa memleketterdiń deni solai óz memlekettik tilderin qoldanady. M.Tájin bul oiymdy qoldady. Biraq ministrliktiń sheshimine Reseidiń Qazaqstandaǵy elshisi Mihail Bocharnikov qarsy boldy. Diplomatiialyq korpýstyń sol kezdegi dýaieni (elshilikterdiń ishindegi kelgen ýaqyty men stajy eń kóbi, basqa elshilikterdiń arasyndaǵy basty ókildigi bolyp tańdalady) Túrkmenstan elshiligi arqyly bizdiń ministrlikke narazylyq notasy kelipti. Onda ózderiniń Qazaqstan Syrtqy ister ministrliginiń bul sheshimimen kelispeitindigin, óitkeni kóptegen elshilikterde qazaq tilin oqi almaitynyn, soǵan bailanysty aldaǵy ýaqytta notalardy orys tilinde jazyp jiberýi kerektigin aitypty.
Buny kórgen soń meniń kóńilim sý sepkendei basyldy. Sebebi, Máskeý ne aitsa sony únsiz atqaryp úirengen basshylyq bundai narazylyq notasyn kórgende jalt burylyp, qujattardy orys tilinde qaldyratyn shyǵar dep oiladym. Alaida, M.Tájinge habarlasyp edim ol qazaq tilinde qaldyramyz degen jaýap aitty. Jáne dýaienge qazaq tilinde jaýap hat jazdy. Onda «barlyq álem elderinde qabyldaǵan halyqaralyq tájiribege sai is-qaǵaz sol eldiń memlekettik tilinde júredi, Konstitýtsiia boiynsha Qazaqstan memleketiniń memlekettik tili qazaq tili. Al, kimde-kim qazaq tilin oqýǵa múmkindigi kelmese tártip boiynsha aýdarmashy jaldasyn» dep jazylǵan. Sóitip, biz artqa shegingen joqpyz. Ministr M.Tájin de óz ustanymynda berik turdy.
Keiin men Túrkimenstan elshisimen kezikken ýaqytta nota jaiyn suradym. Sonyń aldynda Ázerbaijan jáne basqa da elshilikterden notaǵa narazylyq bildirgen-bildirmegenderi týraly suraǵan edim. Olar narazylyq notasyna qol qoimaǵanyn, halyqaralyq tártip boiynsha aýdarmashy alyp jumys istep jatqanyn aitty. Sodan men Túrkimenstan elshisine «bizdi qoldaǵannyń ornyna bul qalai istegenderiń dep» suraǵan edim ol «qaidan bileiik, Reseidiń elshisi kelip, basqa elshiliktermen de kelistik, orys tilinde jazsyn dep talap qoiaiyq degen soń solai nota jiberdik» deidi. Biraq, Resei elshisiniń bul ailasy men qarsylyǵy báribir iske asqan joq, M.Tájin azamattyq kórsetip, olardyń oilaǵanyn oryndatpady.
Mine, Marat Muhambetqazyuly osylai syrtqy ister salasynda eleýli ister atqaryp, óz qoltańbasyn qaldyrǵan basshylardyń qataryna engen bolatyn.
