Kollaj: ult.kz
Búgin Ortalyq Kommýnikatsiialar qyzmetinde Almaty oblysynyń ákimi Marat Sultanǵazievtiń qatysýymen baspasóz brifingi ótti. Brifing barysynda Ult.kz tilshisi ákimge Táýelsizdik merekesin atap ótý men Jeltoqsan, Qańtar qurbandaryn eske alý týraly eki suraq qoidy.«Táýelsizdik merekesin qalai atap ótesiz? Bul kún sizdiń oiyńyzsha Jeltoqsan, Qańtar qurbandaryn eske alý, taǵzym etý kúni me, álde mereke me?» – dep suraǵan edi tilshimiz.
Bul saýalǵa ákim jeltoqsan aiyna josparlary bar ekenin aitty, biraq ol josparǵa 16-17 jeltoqsandy atap ótý kirmeidi eken.
«Birinshi jeltoqsannan bastap kalendarlyq josparlar qurǵanbyz. Onyń ishinde jańa nysandar ashylýy, odan basqa kontserttik baǵdarlamalar júrgizý. Jalpy, osynyń aiasynda ótkizemiz. 16 jeltoqsanda óz basymyz jumysta bolamyz», – dep jaýap berdi ol.
«Endi ol mereke de... Sol qurbandardy eske alý boiynsha qurylǵan mereke emes pe?! Sol sebepten uǵym sondai», – dep pikirin bildirdi.
Tilshiniń ekinshi suraǵy: -«17 jeltoqsanda qurbandardy eske alý úshin alańǵa barasyz ba? Búginge deiin sizdiń Táýelsizdik monýmentiniń janyna barǵanyńyzdy kórmedik. Jalpy, nege sheneýnikter osy kúni monýment basyna barmaidy?» -dedi.
Bul suraqqa ákim qysqa jaýap qaiyrdy:
«Almatydaǵy monýmentti aityp tursyz ba? Oǵan barmaimyn. Sol kúni Qonaev qalasynda bolamyn», – dedi.
Aita keteiik, jyl saiyn 17 jeltoqsanda Almatyda Jeltoqsan oqiǵasynyń qurbandaryn eske alý sharalary ótedi. Qoǵam belsendileri, qala turǵyndary jáne jastar «Táýelsizdik tańy» eskertkishine jinalyp, gúl shoqtaryn qoiyp, qurbandarǵa taǵzym etedi. Din ókilderi de quran baǵyshtaidy. Alaida jyldar boiy bul sharaǵa birde-bir joǵary laýazymdy sheneýniktiń qatyspaýy qoǵam tarapynan jii synǵa ushyrap keledi. Osy kezge deiin Almaty oblysy ákimi ne Almaty qalasy ákimi osy sharada qara kórsetken emes. Biyl da ákimderdiń bul dástúrge qatysýy ekitalai siiaqty.
