كوللاج: ult.kz
بٷگٸن ورتالىق كوممۋنيكاتسييالار قىزمەتٸندە الماتى وبلىسىنىڭ ەكٸمٸ مارات سۇلتانعازيەۆتٸڭ قاتىسۋىمەن باسپاسٶز بريفينگٸ ٶتتٸ. بريفينگ بارىسىندا Ult.kz تٸلشٸسٸ ەكٸمگە تەۋەلسٸزدٸك مەرەكەسٸن اتاپ ٶتۋ مەن جەلتوقسان, قاڭتار قۇرباندارىن ەسكە الۋ تۋرالى ەكٸ سۇراق قويدى.«تەۋەلسٸزدٸك مەرەكەسٸن قالاي اتاپ ٶتەسٸز? بۇل كٷن سٸزدٸڭ ويىڭىزشا جەلتوقسان, قاڭتار قۇرباندارىن ەسكە الۋ, تاعزىم ەتۋ كٷنٸ مە, ەلدە مەرەكە مە?» – دەپ سۇراعان ەدٸ تٸلشٸمٸز.
بۇل ساۋالعا ەكٸم جەلتوقسان ايىنا جوسپارلارى بار ەكەنٸن ايتتى, بٸراق ول جوسپارعا 16-17 جەلتوقساندى اتاپ ٶتۋ كٸرمەيدٸ ەكەن.
«بٸرٸنشٸ جەلتوقساننان باستاپ كالەندارلىق جوسپارلار قۇرعانبىز. ونىڭ ٸشٸندە جاڭا نىساندار اشىلۋى, ودان باسقا كونتسەرتتٸك باعدارلامالار جٷرگٸزۋ. جالپى, وسىنىڭ اياسىندا ٶتكٸزەمٸز. 16 جەلتوقساندا ٶز باسىمىز جۇمىستا بولامىز», – دەپ جاۋاپ بەردٸ ول.
«ەندٸ ول مەرەكە دە... سول قۇربانداردى ەسكە الۋ بويىنشا قۇرىلعان مەرەكە ەمەس پە?! سول سەبەپتەن ۇعىم سونداي», – دەپ پٸكٸرٸن بٸلدٸردٸ.
تٸلشٸنٸڭ ەكٸنشٸ سۇراعى: -«17 جەلتوقساندا قۇربانداردى ەسكە الۋ ٷشٸن الاڭعا باراسىز با? بٷگٸنگە دەيٸن سٸزدٸڭ تەۋەلسٸزدٸك مونۋمەنتٸنٸڭ جانىنا بارعانىڭىزدى كٶرمەدٸك. جالپى, نەگە شەنەۋنٸكتەر وسى كٷنٸ مونۋمەنت باسىنا بارمايدى?» -دەدٸ.
بۇل سۇراققا ەكٸم قىسقا جاۋاپ قايىردى:
«الماتىداعى مونۋمەنتتٸ ايتىپ تۇرسىز با? وعان بارمايمىن. سول كٷنٸ قوناەۆ قالاسىندا بولامىن», – دەدٸ.
ايتا كەتەيٸك, جىل سايىن 17 جەلتوقساندا الماتىدا جەلتوقسان وقيعاسىنىڭ قۇرباندارىن ەسكە الۋ شارالارى ٶتەدٸ. قوعام بەلسەندٸلەرٸ, قالا تۇرعىندارى جەنە جاستار «تەۋەلسٸزدٸك تاڭى» ەسكەرتكٸشٸنە جينالىپ, گٷل شوقتارىن قويىپ, قۇرباندارعا تاعزىم ەتەدٸ. دٸن ٶكٸلدەرٸ دە قۇران باعىشتايدى. الايدا جىلدار بويى بۇل شاراعا بٸردە-بٸر جوعارى لاۋازىمدى شەنەۋنٸكتٸڭ قاتىسپاۋى قوعام تاراپىنان جيٸ سىنعا ۇشىراپ كەلەدٸ. وسى كەزگە دەيٸن الماتى وبلىسى ەكٸمٸ نە الماتى قالاسى ەكٸمٸ وسى شارادا قارا كٶرسەتكەن ەمەس. بيىل دا ەكٸمدەردٸڭ بۇل دەستٷرگە قاتىسۋى ەكٸتالاي سيياقتى.
