Búgin halyqqa onlain rejimde esep berý kezdesýinde Ádilet ministri Marat Beketaev Prezidenttiń tapsyrmasy boiynsha vedomstvo ázirlegen zańdar týraly túsinik berdi, dep habarlaidy QazAqparat.
«Birinshiden, «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańy bar. Zańmen partiialyq sailaý tizimderinde genderlik jáne jastarǵa arnalǵan kvotalar engizildi. Áielder men jastardyń keminde otyz paiyzyn partiialyq tizimge qosý týraly talap qoiyldy. Bul elimizdiń qoǵamdyq-saiasi protsesterine áielder men jastardy belsendi tartý úshin qosymsha quqyqtyq jaǵdailar jasaýǵa múmkindik berdi», - dedi M. Beketaev.
Sonymen qatar ol «Saiasi partiialar týraly» Zańǵa ózgeris pen tolyqtyrýlar engizý týraly» Zańǵa toqtaldy. Ol saiasi partiialardy qurý úshin tirkeý talabyn qyryq myń adamnan jiyrma myń adamǵa deiin tómendetýdi kózdeidi. Zańnyń maqsaty - kóppartiialylyq protsesin odan ári damytýdy qamtamasyz etý, sondai-aq memlekettik sheshimderdi ázirleý men qabyldaý protsesine jańa saiasi partiialardy tartý.
«Aǵymdaǵy jyldyń 25 mamyrynda Memleket basshysy «Qazaqstan Respýblikasyndaǵy sailaý týraly» Konstitýtsiialyq zańyna túzetýlerge qol qoidy. Parlament Májilisine sailaý kezinde saiasi partiialardyń ótý shegi jeti paiyzdan bes paiyzǵa deiin tómendetildi, barlyq deńgeidegi sailaý biýlletenderiniń nysandaryna «Barlyǵyna qarsy» degen jazýy bar baǵan engizildi. Bul norma saiasi básekelestikti arttyrýǵa eleýli úles qosady, sondai-aq memlekettik saiasatty júrgizý barysynda halyqtyń pikirin kóbirek qamtýǵa jáne eskerýge múmkindik beredi dep paiymdaimyz», - dedi ministr.
Úshinshiden, qoldanysqa biyldyń birinshi shildesinen bastap engiziletin Ákimshilik rásimdik-protsestik kodeks qabyldandy. Bul – bizdiń quqyqtyq júie úshin jańa qujat.
«Azamattarǵa memlekettik organdar sheshim qabyldaǵanǵa deiin tyńdaý quqyǵy beriledi. Sonymen qatar, azamattarǵa ótinishti resimdeýge, sondai-aq dáleldemeler bazasyn jinaýǵa kómek kórsetýde sottyń belsendi róli engiziledi. Ákimshilik ádiletti engizý memleket pen qoǵam arasyndaǵy qarym-qatynasqa jańa serpin beredi», - dedi vedomstvo basshysy.
