Ulttyq qoǵamdyq senim keńesiniń múshesi, Eýropalyq quqyq jáne adam quqyqtary institýtynyń direktory Marat Báshimov Prezidenttiń Úkimettiń keńeitilgen otyrysyndaǵy tapsyrmalaryna qatysty pikir bildirdi. Zańgerdiń aitýynsha bul otyrys burynǵy jiyndardan mańyzy joǵary. Sebebi qazir Úkimettiń eń mańyzdy jumysy – halyqtyń densaýlyǵyn saqtaý bolyp otyr, dep habarlaidy QazAqparat.
«Úkimettiń keńeitilgen búgingi otyrysy barlyq jaǵynan da mańyzdy boldy. Óitkeni halyq qazir bilik tarapynan naqty qandai sharalar qabyldanatynyn kútip otyr. Eldegi jaǵdaidy ózińiz kórip otyrsyz. Qasym-Jomart Toqaev buǵan deiin de eń aldymen qarapaiym halyqtyń ómiri men densaýlyǵyn birinshi orynǵa qoiýymyz kerektigin aityp ketken bolatyn. Búgin otyrysta osy sózin shegelei túsip, halyqtyń densaýlyǵy – ulttyq qaýipsizdik máselesimen tikelei bailanysty ekenin aitty. Iaǵni Prezident ulttyq qaýipsizdikke basa mańyz berip otyr. Sebebi azamattardyń quqyqtary men densaýlyǵy – ulttyq qaýipsizdik týraly zańnyń birinshi betterinde-aq tur. Zańger retinde Memleket basshysynyń osy sózine erekshe nazar aýdardym», - dedi Marat Báshimov QazAqparat tilshisine telefon arqyly bergen jaýabynda.
Sarapshynyń aitýynsha Prezident Úkimet pen ministrlikterge, ákimdikterge densaýlyq saqtaý salasyn birinshi orynǵa qoiylýy kerektigin eskertkenin aityp ótti.
«Úkimetke eldegi ahýaldy jaqsartýǵa eki apta berildi. Bul – Úkimet úshin synaq bolǵaly tur», - dedi ol.
