Belgili quqyqtanýshy, Ulttyq qoǵamdyq senim keńesiniń múshesi Memleket basshysynyń karantin tártibin uzartý týraly sheshimine qatysty pikir bildirdi, dep habarlaidy "Ult aqparat".
«Karantin 1 mamyrǵa deiin uzartyldy. Bul durys sheshim. Áitpese karantindi toqtatý kerek, otyrýdan sharshadyq degendei áńgimeler tarai bastady áleýmettik jelide. Biraq virýstyń sharyqtaý shegi, bizde de, kórshilerimizde de, álemniń kez kelgen núktesinde ótken de joq. Sondyqtan beiqamdyq áli de ómirge qaýip tóndiredi. Dál osy rette Prezident Qasym-Jomart Toqaevtyń sózi dál aitylyp otyr», - dep jazady quqyqtanýshy Facebook-tegi paraqshasynda.
Zańgerdiń pikirinshe, halyq qaýipsizdikti saqtai bilýi tiis. Sebebi keibir óńirde koronavirýsty juqtyrǵandardyń sany artyp barady.
«Memleket basshysy óz sóziniń sońynda týra aitty: karantin kezinde adamdardan úiden bolýyn talap etemiz dedi. Álbette úide oqshaýlaný adamdar úshin ońaiǵa túsip turǵan joq. Biraq Prezident aitqandai, basqa shara da joq», - deidi ol.
Eske sala ketsek buǵan deiin QR Prezidentiniń baspasóz hatshysy Berik Ýáli Qasym-Jomart Toqaevtyń tóraǵalyǵymen Tótenshe jaǵdai jónindegi Memlekettik komissiianyń otyrysynda TJ rejimin sáýirdiń aiaǵyna deiin sozýdy tapsyrǵanyn habarlaǵan edi.
