Memleket basshysy Qasym-Jomart Toqaev Ishki ister ministri Marat Ahmetjanovty qabyldady, dep habarlaidy "Ult aqparat" Aqordaǵa silteme jasap.
Prezidentke elimizdegi kriminogendik jaǵdai týraly málimet berildi. Vedomstvo basshysynyń aitýynsha, qylmystyq ister kórsetkishi 7,6 paiyzǵa tómendegen. Sonyń ishinde densaýlyqqa aýyr zaqym keltirý, qaraqshylyq, tonaý, mal urlyǵy, buzaqylyq, alaiaqtyq jáne zorlaý derekteri aitarlyqtai azaiǵan.
Ministr qańtar oqiǵasy kezinde jasalǵan qylmystardy tergep-tekserý, kinálilerdi anyqtap, jaýapqa tartý, urlanǵan qarýlardy zańsyz ainalymnan alý jumystary jóninde esep berdi.
Sonymen qatar Memleket basshysy qaýipsizdik máselelerin qoǵammen seriktestik ornatý arqyly sheshýge negizdelgen politsiianyń servistik modeliniń engizilý barysymen tanysty.
Marat Ahmetjanov Prezidentke Ishki ister ministrliginiń qyzmetin biýrokratiiadan aryltý, tsifrlandyrý jáne jumys úderisin avtomattandyrý, ishki rásimderdi ońtailandyrý jóninde baiandady.
Budan bólek ol úderisterdi jedel basqarý úshin Big Data taldaý quraldaryn paidalana otyryp, kriminogendik jaǵdaidy monitoringteý úshin IIM-niń Ahýaldyq saraptama ortalyǵynyń qurylǵany jóninde baiandady.
Qasym-Jomart Toqaevqa Jol júrý erejelerin qasaqana buzǵandardy anyqtaýǵa baǵyttalǵan «Qorǵaý» dep atalatyn jańa baǵdarlama tanystyryldy. Ministr Memleket basshysyna Nur-Sultan, Almaty jáne Shymkent qalalarynda baǵdarlamany qoldaný arqyly júrgizilgen jumystardyń nátijeleri týraly aitty.
Sondai-aq Prezidentke Qaýipsizdik máselelerin azamattyq qoǵammen seriktestik ornatý arqyly qamtamasyz etý tujyrymdamasynyń jobasy ázirlenip jatqany jóninde málimet berildi.
Kezdesý qorytyndysy boiynsha Prezident politsiianyń servistik modelin odan ári engizý, elimizde azamattardyń qaýipsizdigi men quqyqtyq tártipti qamtamasyz etý jóninde birqatar naqty tapsyrma berdi.
Osy rette Memleket basshysy jol qaýipsizdigin qamtamasyz etý salasyndaǵy jaýapkershilikti qatańdatý qajet ekenin erekshe atap ótti.
