Týrizm jáne sport ministriniń orynbasary Serik Jarasbaev Ońtústik Afrika Respýblikasynyń Keiptaýn qalasynda ótken halyqaralyq marafonǵa qatysyp, úzdik ondyqqa engen 81 jastaǵy marafon sheberi Saltanat Túitebaevqa «Eńbek ardageri» tósbelgisin tabystady, dep habarlaidy ult.kz.
Saltanat Túitebaev 45 jyldyq eńbek jolyn bilim berý salasyna arnap, halyqaralyq arenada Qazaqstannyń abyroiyn asqaqtatyp júrgen ardager marafon sheberi. Kezdesý barysynda onyń qajyrly eńbegi men sportqa degen adaldyǵy óskeleń urpaqqa úlgi ekeni atap ótildi.
«Seksenniń seńgirine sergek jetip, uzaq qashyqtyqtaǵy marafondy baǵyndyrýyńyz – úlgi tutarlyq jetistik ári elimiz úshin zor qýanysh. Sebebi salamatty ómir saltyn qalyptastyrýǵa baǵyttalǵan memlekettik saiasattyń jarqyn kórinisi sizdiń bolmysyńyzdan aiqyn baiqalady. Buǵan deiin de birneshe márte júldeli oryndardan kórinip kelesiz. Osy arqyly tabandylyq pen qajyrly eńbektiń naqty úlgisin kórsetip, kópshilikke ónege boldyńyz», – dedi Serik Jarasbaev.
Jeńil atletikadan halyqaralyq dárejedegi sport sheberi Saltanat Túitebaev 1945 jyly Jambyl oblysy Moiynqum aýdanynda dúniege kelgen. Eńbek jolyn ustazdyqtan bastap, mektep direktory, bilim bóliminiń inspektory jáne kásiptik-tehnikalyq ýchilishe basshysy qyzmetterin atqarǵan.
Ardager sportshy keiingi jyldary halyqaralyq marafondarda joǵary nátije kórsetip keledi. Ol Singapýr, Dýbai, Doha, Antaliia, Malaga jáne Amsterdam qalalarynda ótken halyqaralyq jarystardyń jeńimpazy atanǵan.
2016 jyly Aýstraliianyń Pert qalasynda ótken álem chempionatynda 70+ sanatynda kúmis júlde ielense, 2017 jyly Jańa Zelandiianyń Oklend qalasynda ótken Ardagerler olimpiadasynda chempion atandy. Sondai-aq 2021 jyly Niý-Iork marafonynda 75+ jas sanatynda ekinshi oryn aldy.
