Mańǵystaý oblysynyń Úshtaǵan aýylynda turatyn erli-zaiyptylar qolóner buiymdarynyń erekshe úlgisin jasaýda, dep habarlaidy "Ult aqparat".
Aýyl turǵyndary Mýsahan Egizbaev pen Eleihan Egizbaeva jastarǵa qolóner buiymdaryn jasaýdyń jolyn úiretip júr. Eskirgen jabdyqtardy jańartyp, órmek toqý men kórpe tigý jumysyna qyz-kelinderi men nemere-jienderi de qolǵabys etedi. Biri urshyq iirse, biri toqyma toqidy, endi biri kiiz basý úshin jún sabaidy.
«Maldyń terisinen tósenish daiyndaý úshin, aldymen terini daiyndap alamyz. Áýeli soiylǵan maldyń terisin tuzdap alý qajet. Sodan soń keptiredi. Keiin ystyq sý jáne airanmen jýyp las terisin alyp, iisin ketiremiz. Keýip, jup-jumsaq teri daiyn bolǵanda paidalanady. Maldyń terisi, júni, súiegi, ishegi bári paidaǵa asady. Terisinen kezinde tymaq, ishik pishetinbiz. Qazir jumsaq, adam aǵzasyna paidaly terini balalarǵa jylylyqqa tóseimin. Budan bólek túie júninen kórpe tigip, qoidyń júninen kiiz basamyz. Júndi tazalap jýyp, jip etip shulyq, jempir, eshki júninen túbit oramal toqimyz. Kezinde ishegin dombyraǵa ishekke paidalanatynbyz. Qazir bul qundylyqtardy úirenýge nietti jastar az. Osyndai qoldan jasalatyn tabiǵi dástúrli qolóner buiymdaryn keiingi urpaqqa úiretý maqsatymyz»,- deidi Eleihan Egizbaeva.
Al, otaǵasy Musahan Egizbaev qamshy órip, súiekten sabyn jasaidy.
«Aldymen, túieniń terisin tuzdap, tazartyp, airanmen ilep, paidaǵa asatyndai jumsarǵan soń alty, segiz tipti on eki órimge qarai tilinedi. Jyńǵyl aǵashyn jonyp bes tutam etip daiyndap, tórt tutam basyna teriden qamshy etip óredi de taramyspen tigedi. Taramys degenimiz - iri qaranyń sińirinen alynǵan berik jip. Taramys ázirleý úshin kúzde soǵymǵa soiylǵan iri qaranyń jelke, jilinshik sińirlerin etsiz sylyp alý kerek. Sylynǵan sińirlerdi kóleńkege ilip qoiyp, babymen keptiredi. Ábden kepken taramysty balǵamen jumsartady. Qamshy sekildi teriden jasalatyn buiymdardy osy taramyspen tigedi. Al, maldyń súiegin ábden qainatyp sabyn daiyndaidy. Súiek maiy tolyq qainaǵan soń súiekti alyp tastap, itsigek shóbin qosyp qoiýlanǵansha qainatyp ár túrli qalyppen sabyn jasaýǵa bolady»,- dedi Mýsahan Egizbaev.
