Biyl Mańǵystaýǵa kelgen týrister sany shamamen 177 myńnan asty. Bul týraly Mańǵystaý oblysynyń ákimi Serikbai Trumov Ortalyq kommýnikatsiialar qyzmetinde ótken onlain brifingide málim etti, dep habarlaidy "Ult aqparat".
Oblys ákiminiń aitýynsha, Mańǵystaý – elimizdegi týrizmdi damytýǵa qolaily aimaqtardyń úzdik ondyǵyna kiredi. Aqtaý qalasynda jaǵajai týrizmin, al aýdandarda eko-etnotýrizmdi damytýǵa múmkindik zor. Búginde óńirdegi týrizmdi órkendetý maqsatynda keshendi jospar jasaqtalyp, salany jetildirý baǵyty aiqyndaldy. Osy jumystyń nátijesinde biyl óńirimizge 117 myńnan astam týrist kelgen. Onyń 67 myńnan astamy shilde aiynda ashylǵan «Riksos Aqtaý» qonaq úi demalys keshenine kelgender. «Riksos Aqtaý» jobasy Ortalyq Aziiadaǵy kýrorttyq tiptes eń iri otel. Bul joba aimaq týrizimniń damýyna tyń serpin berdi.
«Osy jyldyń 2-shi toqsanynda osy týrizm salasynda 1 mlrd teńgeniń qyzmeti kórsetilgen. Biyl óńirge 177 myń týrist kelgen. Onyń basym bóligi jaz ailarynda qydyryp kelgen. Aqtaý qalasynyń «Jyly jaǵajai» teńiz kýrorttyq aimaǵyn infraqurylymmen qamtý maqsatynda Úkimettiń qoldaýymen 17 mlrd teńgege 31 shaqyrym jol salyndy. 2020 jyldyń 1-jartysynyń qorytyndysymen týrizm salasyna salynǵan investitsiia kólemi 68,7 mlrd teńgeni qurap, 3,7 esege artty», - dedi oblys ákimi S. Trumov.
Óńirde jyly jaǵajaida jobalardy iske asyrýdyń ekinshi kezeńi bastaldy. Onda 5 qonaq úi salynady. Qazir úsheýiniń qurylysy bastalyp ketti. Jyly jaǵajaida jańa qonaq úiler, golf klýb, taqyryptyq oiyn-saýyq saiabaǵyn salý josparlanǵan. Jalpy joba quny 1.2 mlrd AQSh dollary.
«Munyń barlyǵy Qazaqstan Respýblikasynyń Tuńǵysh Prezidenti, Elbasymyz N.Nazarbaevtyń bastamasymen júzege asyrylyp jatyr. Ózderińiz bilesizder 2018 jyly Aqtaýda ótken Samitte Elbasy Aqtaý - teńiz kýrortyna ainalýy tiis dep, kýrortty aimaqty damytýdy tapsyrǵan bolatyn», - dedi oblys ákimi.
