Mańǵystaý oblysynyń ziialy qaýym ókilderi QR Prezidenti Qasym-Jomart Toqaevqa Bozjyra aýmaǵyndaǵy jańa týrizm jobalaryn qurýyn qoldap úndeý joldady, dep habarlaidy "Ult aqparat".
***
Asa qurmetti Qasym-Jomart Kemeluly!
Biz, mańǵystaýlyq ziialy qaýym ókilderi, ata–babalarymyzdyń jáne keleshek urpaǵymyzdyń aldyndaǵy mindetter men jaýapkershiligimizdi sezine otyryp, Ózińizge úndeý joldaimyz.
Mańǵystaý óńiri – Qazaqstandaǵy týrizmdi damytýǵa qolaily aimaqtardyń biri ekendigi áigili.
Biyl teńiz jaǵalaýynda bes juldyzdy Rixos qonaqúiiniń ashylýymen, óńirge kelgen týrister sany artty. Kelgen saiahattaýshylar Mańǵystaýdyń tabiǵi jerlerin de aralap, ásirese Bozjyra shatqalyna qyzyǵýshylyq tanytýda. Ózińizge belgili, investorlar tarapynan Bozjyra aýmaǵynda jańa týrizm nysanyn salýǵa usynys túsip, búgingi tańda qoǵam tarapynan talqylanýda.
Biz qasietti qanmen qorǵalǵan kieli topyraqtyń qutyn qashyrýǵa jol bermeýimiz kerek. Ol urpaqqa amanat. «Jabaiy» týrizmge toqtaý salynýy kerek.
Sondyqtan, Sizdiń tapsyrmańyz boiynsha arnaiy ǵalymdardan quralǵan top Bozjyra aimaǵyna, onyń florasy men faýnasyna ziian keltirmeitin Jobany iske asyrýǵa bolady degen qorytyndyǵa keldi.
Bul sheshim halyqtyń júregine jol tapqany sózsiz.
Bul usynys óńirimizdiń damýyna oń yqpalyn tigizetindigin barlyǵymyz da túsinemiz:
Birinshiden, munaiǵa ǵana táýeldilikti joiyp, týrizmdi damytý arqyly ekonomikamyzdy órkendetemiz. Shaǵyn jáne orta biznestiń damýyna, jergilikti azamattardyń jumyspen qamtylýyna jol ashamyz. Qonaq úi qurylysy jumysy bastalsa, osy mańdaǵy aýyl turǵyndaryn jumyspen qamtýǵa múmkindik bar.
Ekinshiden, bul keshen týristerdiń Bozjyraǵa óz betinshe beibereket baryp, tabiǵatqa orasan ziian keltirýine tosqaýyl bolady.
Sondyqtan, bul aimaqqa baratyn jol salyp, týristerdiń jaily demalýyna jaǵdai jasalýymen qatar, zańnamalyq aktilermen tiisti Qaǵidalardyń bekitilýine senimdimiz. Iaǵni, Bozjyra aýmaǵynda salynatyn týrizm infraqurylymy tabiǵatty qorǵaý, saqtaý jáne jergilikti tarihi-tabiǵi oryndardyń sakraldylyǵyn saqtaý, jergilikti dil, tanym-ǵuryptyq qundylyqtarymyzdy eskere otyryp, órkenietti jolmen týrizm mádenietin qalyptasqanyn qalaimyz!
Mártebeli Prezident myrza!
Sońǵy ailarda Bozjyra Mańǵystaýdyń ǵana emes, tutas eldiń bas taqyrybyna ainaldy. San túrli pikir, jan-jaqty oi aitylýda. Birneshe aidan beri talqylanyp, baspasóz betinde talai jazyldy. Durys, bul – qoǵam talaby ári ózińiz aitqan ashyqtyqtyń naǵyz kórinisi dep bilemiz.
Endigi kezekte el bolyp, ortaq sheshim qabyldap, núktesin qoiatyn kez keldi dep oilaimyz. Eldigimiz ben aýyzbirshiligimiz osyndaida synalady.
Halyqtyń pikirin estip, joba jan-jaqty zerttelip, zerdelengennen keiin ǵana iske asyrýǵa sheshim qabyldaǵanyńyz úshin Ózińizge zor alǵys aitamyz!
Jobanyń sarapshylar, qoǵamdyq keńester men jaýapty sala jetekshileriniń oi-pikirlerin eskere otyryp júzege asyrylatyndyǵyna senemiz.
Bozjyranyń saqtalýy biz úshin bolashaq urpaq aldyndaǵy paryz, sondai-aq, bul joba eldiń damýy úshin kerek!
Mańǵystaýlyqtar mamandarmen tyńǵylyqty talqylanǵan, saraptalǵan, naqtylanǵan jobanyń iske asyrylýyn durys dep biledi jáne qoldaidy!
Qurmetpen,
ziialy qaýym ókilderi:
Bektur Tóleýǵaliev, jazýshy, QR jazýshylar Odaǵynyń múshesi;
Sabyr Adai, aqyn, QR eńbek sińirgen qairatkeri;
Orynbasar Toqjanov, QR ekologiia salasynyń úzdigi;
Otynshy Kóshbai, etnograf, ólketanýshy;
Svetqali Nurjan Aitman Aitman, aqyn, QR jazýshylar Odaǵynyń múshesi;
Ǵalym Árip, aqyn, QR jazýshylar Odaǵynyń múshesi;
Aitýar Ótegenov, aqyn, QR jazýshylar Odaǵynyń múshesi;
Nurlan Qulbai, ólketanýshy, QR mádeniet salasynyń úzdigi;
Ánýar Bimaǵambet, aqyn, QR jazýshylar Odaǵynyń múshesi;
Andrei Astafev, tarihshy, arheolog;
Sultanbek Qudaibergen, aqyn, ónertanýshy;
Saqyp Kerelbaev, qoǵam qairatkeri;
Qoja-Ahmet Demeýbergenuly, QR qurmetti jýrnalisty;
Edil Jańbyrshin, depýtat;
Samat Mýsabaev, depýtat.
Eske sala keteiik, keshe Nurlan Nyǵmatýlin Nur Otan partiiasy parlamenttik fraktsiiasynyń keńeitilgen otyrysynda depýtattyń Bozjyra máselesine qatysty qoiǵan suraǵy orynsyz ekenin aitty.
