Ońtústik Koreianyń Pýsan qalasynda ótken IýNESKO-nyń Búkilálemdik mura komitetiniń 48-sessiiasynda «Mańǵystaýdyń jerasty meshitteri jáne olarmen sabaqtas nysandar» Búkilálemdik muralar tizimine engizildi, dep habarlaidy ult.kz.
Nominatsiiany ázirleý jáne usyný jumystary Memleket basshysy Qasym-Jomart Toqaevtyń 2024 jyly Atyraýda ótken Ulttyq quryltaidyń úshinshi otyrysynda bergen tapsyrmasyna sáikes júrgizildi. Prezident Mańǵystaýdyń biregei tabiǵi kelbeti men tarihi-mádeni murasyn álemge keńinen tanytýdy jáne óńirdegi jerasty meshitterdi IýNESKO-nyń Búkilálemdik muralar tizimine engizý jumysyn bastaýdy tapsyrǵan bolatyn.
Seriialyq nysan quramyna Shopan ata, Qaraman ata, Shaqpaq ata, Sultan epe jáne Beket ata atty bes kieli keshen endi.
IýNESKO-nyń Búkilálemdik mura komiteti nysannyń (ii) jáne (iii) kriteriiler boiynsha airyqsha ámbebap qundylyǵyn moiyndady. Komitet Mańǵystaýda sopylyq dástúr men kóshpeli mádeniettiń san ǵasyrlyq sabaqtastyǵy nátijesinde qalyptasqan biregei kieli keńistiktiń álemdik mádeni mura úshin mańyzyn atap ótti.
Árbir keshenniń quramyna jerasty meshitteri, qorymdar, sopylyq ilim ókilderiniń keseneleri men jerleý oryndary, ziiarat joldary, kieli qudyqtar jáne dini máni bar ózge de nysandar kiredi. Bul oryndar ǵasyrlar boiy úzilmegen rýhani dástúrdiń saqtalýyna yqpal etip, búginge deiin ziiarat etýshilerdiń mańyzdy ortalyǵy retinde mańyzyn joǵaltqan joq. Sonymen qatar kieli oryndardy kútip-baptap, olardyń sabaqtastyǵyn jalǵap kele jatqan shyraqshylyq dástúri de saqtalǵan.
Bes keshenniń barlyǵy memleket qorǵaýynda jáne Respýblikalyq mańyzy bar tarih jáne mádeniet eskertkishteriniń memlekettik tizimine engizilgen. Olardy uzaq merzimge saqtaýdy qamtamasyz etý maqsatynda 2027-2032 jyldarǵa arnalǵan keshendi basqarý jospary ázirlenip jatyr.
Qujatta eskertkishterdi saqtaý, kieli tarihi-mádeni keńistikti qorǵaý, kelýshiler aǵynyn tiimdi uiymdastyrý, yqtimal qaterlerdiń aldyn alý jáne ǵylymi zertteýler júrgizý máseleleri qamtylǵan.
