«QazMunaiGaz» Qazaqstanda munai men gaz kondensatyn óndirýdiń 25 paiyzyn qamtamasyz etedi. Bul týraly kompaniianyń basqarma tóraǵasy Maǵzum Myrzaǵaliev aitty, dep habarlaidy QazAqparat.
«Búginde «QazMunaiGaz» Qazaqstanda munai men gaz kondensatyn óndirýdiń 25 paiyzyn jáne kómirsýtekterdi óńdeýdiń 81 paiyzyn qamtamasyz etedi. Osy kezeńde munai óndirý kólemi 3 esege ósti. Eger 2002 jyly bul kórsetkish 7,4 mln tonna bolsa, byltyrǵy qorytyndyda 21,6 mln tonnany qurady. Nátijesinde kompaniianyń munai óndirý kólemi 300 mln tonnadan asty. «QazMunaiGazǵa» elimizdegi úsh munai óńdeý zaýyty qarasty. Olar – Pavlodar, Atyraý, Shymkent zaýyttary jáne Aqtaý qalasynda bitým zaýyty bar. 2002-2021 jyldary aralyǵynda munai óńdeý kólemi 18,8 mln tonnaǵa deiin ulǵaidy. Iaǵni, 8,2 esege ósti», - dedi Maǵzum Myrzaǵaliev «2025 jylǵa deiin halyqtyń tabysyn arttyrý baǵdarlamasy» keshendi josparyn júzege asyrý jónindegi keńes barysynda.
Onyń dereginshe, birlesken kásiporyndardy qosa alǵanda, «QazMunaiGaz» qaramaǵynda 73 myńnan astam qyzmetker bar. Sonymen qatar iri merdigerlik uiymdar mamandarynyń sany 27 myńdy quraidy.
«Kompaniiamyz Qazaqstannyń barlyq óńirinde jumys isteidi. Bizdiń kásiporyndar kóp shoǵyrlanǵan aimaq - Mańǵystaý oblysy. Sondyqtan bul aimaqtaǵy jaǵdai jiti nazarymyzda. Ondaǵy 18 kásiporynda 30 myńǵa jýyq adam jumys isteidi. Sonymen qatar kásiporyndarymyzǵa qyzmet kórsetetin 90-nan astam merdigerlik uiym bar. Ol mekemelerde 19 myńnan astam qyzmetker eńbek etedi. Jańaózende «ÓzenMunaiGazdy» qosa alǵanda, 6 kásiporyn ornalasqan. Olarda jalpy 13 myńnan astam jumys isteidi. Al merdigerlik mekemelerde shamamen 12 myń adam», - dedi kompaniia basshysy.
