Qazaqstan Prezidenti Qasym-Jomart Toqaev gaz salasyn damytý jónindegi keńeste Mańǵystaýda gaz óńdeitin jańa zaýytty 2023 jyldan keshikpei paidalanýǵa berýdi tapsyrdy, dep habarlaidy "Ult aqparat".
Qasym-Jomart Toqaevtyń aitýynsha, sońǵy úsh jylda elimizde suiytylǵan munai gazyn tutyný deńgeii eki eseden astam ósken.
«Tek Mańǵystaý oblysynda avtokólikterdiń 90 paiyzdan astamynda suiytylǵan gaz paidalanylady. Óńirdiń negizgi gaz jetkizýshisi - Qazaq gaz óńdeý zaýyty. Onyń negizgi qural-jabdyqtarynyń 90 paiyzy tozǵan. Zaýyttyń apattyq jaǵdailarǵa bailanysty toqtap qalýy halyqty gazsyz qaldyrýy múmkin. Osy rette Qazaq gaz óńdeý zaýytynyń bazasynda salynatyn jańa gaz óńdeý zaýytynyń qurylysyn keshiktirý ekonomikalyq turǵydan ǵana emes, sondai-aq, áleýmettik jaǵynan da qaýip týǵyzady. Úkimetke «Samuryq-Qazyna» qorymen birlesip, atalǵan baǵyttaǵy jumysty jandandyrýdy tapsyramyn. Jańa zaýyt 2023 jyldan keshikpei paidalanýǵa berilýi tiis», – dedi Memleket basshysy.
