Mańǵystaý oblysy Mańǵystaý aýdanynda jylqy qyrylyp jatyr. Osy aýdandaǵy Ondy aýylynyń turǵyny, azamattyq belsendi ári jýrnalist Jánibek Qojyqtyń málimdeýinshe, búginde aýdandaǵy qyrylǵan jylqy sany 300-ge jýyqtaǵan, dep habarlaidy Azattyq.
Onyń aitýynsha, jylqy malynyń qyrylýyna biylǵy qarashadan beri qalyń túsken qar men mal azyǵynyń azdyǵy sebep.
– Jylda qys jyly bolatyn. Biyl qarasha aiynda qar qalyń jaýyp, arty jańbyrǵa ainalyp, jer muz bolyp qaldy. Jem-shóp bar bolǵanymen baǵasy ýdai qymbat. Qunary joq 20 kg kebek jem 1500 teńgeden satylady. Bir kg kebek jemniń baǵasy 75 teńge, shóptiń bir túgi kúzde 750-1000 teńgeniń arasynda satyldy. Ony jurttyń bári birdei ala almai otyr, – deidi ol.
Aýdan ákimdigi de bul jaǵdaidy rastap, qoldan kelgenin jasap jatqandaryn aitady. Mańǵystaý aýdany ákiminiń orynbasary Asqar Aqqulov ieleri durystap qaramaǵannan mal qyrylyp jatyr dep sanaidy.
– Mal azyǵyn biyl pandemiiaǵa bailanysty tolyq ázirlei almadyq. Jylda 27 brigada shóp shapsa, biyl tek 13 brigada jumys istedi. Qazir 20 kg jemdi 1400 teńgeden bergizip jatyrmyz. 34 rýlon shóp aýyldarǵa jiberdik, taǵy 78 rýlony jolda keledi. Kóp adam vahtamen jumys isteidi de, maldaryn bos qoia beredi. Ishindegi aryqtaryn jemdep, jyly sý berip, malǵa qaraýy kerek qoi, – deidi ákimniń orynbasary.
Mańǵystaý aýdanynda 36 sharýa qojalyǵy malmen ainalysady. Aýdanda jalpy sany 24 myń jylqy, 10 myńǵa jýyq siyr, 27 myń túie, 126 myń qoi, 49 myń eshki bar.
Mańǵystaý aýdanynyń ortalyǵy – Shetpe stansasy oblys ortalyǵy Aqtaý qalasynan soltústik-shyǵysqa qarai 100 kilometrdei qashyqta ornalasqan.
