QR Premer-Ministri Mańǵystaý oblysyna jumys sapary aiasynda óńirdiń áleýmettik-ekonomikalyq damý máseleleri jóninde keńes ótkizdi, dep habarlaidy "Ult aqparat" primeminister.kz saityna silteme jasap.
Álihan Smaiylov keńes basynda Mańǵystaýdyń el damýyna, ulttyq ekonomikaǵa eleýli úles qosyp kele jatqanyn atap ótti. Óńirde óńdeý ónerkásibi, munai servisi, qurylys indýstriiasy, kólik, logistika jáne týrizm salasy qarqyndy damyp keledi.
Baiandamashylardy tyńdaǵan Úkimet basshysy Memleket basshysynyń tapsyrmasy boiynsha qabyldanǵan Óńirdi damytýdyń 2025 jylǵa deiingi keshendi jospary aiasynda birqatar mańyzdy jobalardyń iske asyrylatynyn atap ótti, bul jańa ónimder shyǵarýǵa, jumys oryndaryn quryp, oblys turǵyndarynyń turmys-tirshiligin jaqsartýǵa múmkindik beredi.
«Josparlanǵan jobalardyń sapaly iske asyrylýyn qamtamasyz etip, óńirdiń odan ári áleýmettik-ekonomikalyq damýyna serpin berý qajet. Bul – aimaq basshylyǵynyń aldyna qoiylatyn negizgi mindetterdiń biri. Buǵan Úkimet tarapynan qajetti qoldaý kórsetiledi», — dedi Premer-Ministr.
Sondai-aq Álihan Smaiylov biyl respýblikalyq biýdjetten óńirdi damytýǵa bólingen qarajat aiasynda jańa mektepter men kóp páterli úiler salý, kúre joldardy jańǵyrtý jáne jóndeý, injenerlik jáne áleýmettik infraqurylymdy, sondai-aq densaýlyq saqtaý jáne bilim berý salalaryn damytý josparlanǵanyn atap ótti. Odan bólek, qarajat agroónerkásiptik keshendi jáne ónimdi jumyspen qamtýdy qoldaýǵa baǵyttalatyn bolady.
Oblys basshylyǵynyń aldynda turǵan mańyzdy mindet retinde Úkimet basshysy azyq-túlik baǵasynyń ósýin tejeý máselesin atady.
«Oblysta jyl basynan beri áleýmettik mańyzy bar azyq-túlik taýarlarynyń baǵasy 16%-ǵa ósti. Baǵanyń negizsiz ósýine jol bermeý úshin qolda bar quraldardy tolyǵymen ári tiimdi qoldaný mańyzdy», — dedi Premer-Ministr.
Álihan Smaiylov oblys ákimdigi saýda ústemesine baqylaýdy kúsheitip, ońtústiktegi óńirler men shekaralas memleketterden erte pisetin kókónisterdi jetkizýge tikelei sharttar jasasýy kerek ekenin, «ainalym shemasy» mehanizmin keńinen qoldanyp, forvardtyq satyp alý boiynsha qarjylandyrýdy ulǵaitýy qajet ekenin aitty.
Úkimet basshysy óńirdegi ózekti másele – jumyssyzdyq, ony sheshýdiń negizgi joly investitsiia tartý ekenin aitty. Biyl myńnan astam jumys ornyn qurýmen 21 investitsiialyq jobany iske qosý josparlanyp otyr.
«Biraq bir myń degenimiz ne? Oblysta 20 myńnan astam jumyssyz azamat tirkelgen. Oblys basshylyǵy salalyq ministrliktermen jáne “Samuryq-Qazyna” qorymen birlesip, jańa investitsiialyq jobalardy iske qosý jáne halyqty jumyspen qamtamasyz etý múmkindikterin qarastyrýy kerek», — dedi Álihan Smaiylov.
Sondai-aq óndiristik kásiporyndardaǵy eńbek daýlaryn sheshýdiń tiimdi sharalaryn qabyldaǵan jón.
Keńesti qorytyndylai kele, Premer-Ministr Mańǵystaý oblysynyń eldi mekenderin gazdandyrý jáne sýmen jabdyqtaý máselelerine qatysty birqatar basqa da tapsyrmalardy atap ótti.
Úkimet basshysy fermerlerdi mal azyǵynyń qajetti kólemimen qamtamasyz etý máselelerine erekshe nazar aýdardy. Osyǵan bailanysty Aýyl sharýashylyǵy ministrligi «Qazaqstan temir joly» UK» AQ-men jáne oblys ákimdigimen birlesip, jeńildikterdi uzartý men jem-shópti óńirlerge jetkizý boiynsha túbegeili sharalar qabyldaýy qajet.
Jiynda oblys ákimi Nurlan Noǵaev, indýstriia jáne infraqurylymdyq damý ministri Qaiyrbek Óskenbaev, ekologiia, geologiia jáne tabiǵi resýrstar ministri Serikqali Brekeshev, aýyl sharýashylyǵy ministri Erbol Qarashókeev, ulttyq ekonomika vitse-ministri Baýyrjan Omarbekov, eńbek jáne halyqty áleýmettik qorǵaý vitse-ministri Erjan Birjanov, energetika vitse-ministri Áset Maǵaýov, «QazMunaiGaz» UK» AQ basqarma tóraǵasy Maǵzum Myrzaǵaliev baiandama jasady.
