Aqtaýdaǵy Ana men bala ortalyǵynyń ujymy tórtem men onyń anasyn saltanatty túrde úiine shyǵaryp saldy, – dep habarlaidy Mańǵystaý oblysynyń qoǵamdyq kommýnikatsiia ortalyǵy.
Aqtaý qalasynyń turǵyny Samira Gasanova 2020 jyldyń 15 jeltoqsan kúni bosanǵan bolatyn. Júktilik kezeńi aýyr bolǵandyqtan dárigerler áieldi júktiliktiń 30-shy aptasynda operatsiia jasap, bosandyryp alǵan. 1 ul men 3 qyz dúniege keldi. 25 jastaǵy kelinshek osylaisha birden kópbalaly ana atandy. Sábiler - otbasynyń tuńǵyshy.
«Qýanyshymdy jasyra almai turmyn. Ata-anamyzdyń tóbesi kókke jetkendei boldy. Balalarymnyń aman-esen jaryq dúniege kelýine sebepshi bolǵan dárigerlerge otbasymnyń atynan alǵysymdy aitamyn», - deidi Samira Gasanova.
Tórtemderdiń biri - 1 keli 390 gr bolsa, eń kishisiniń salmaǵy - 1 keli 190 gr. Shaqalaqtar kúsh jinaǵansha 36 kún boiy perinataldyq ortalyq dárigerleriniń jiti baqylaýynda boldy. Anasynyń da, balalarynyń da densaýlyǵy jaqsy deidi dárigerler. Ata-anasy nárestelerdi Rasýl, Fanara, Aila jáne Narin dep atady.
«Byltyr bizdiń ortalyqta 8610 bala jaryq dúnie esigin ashty. Onyń ishinde 2 úshem men 147 egiz bala dúniege kelgen», - dedi Mańǵystaý oblystyq Ana perinataldyq ortalyǵynyń dáriger neanotology Toidyq Jumaǵambetova.
Mańǵystaý oblysy bala týý kórsetkishinen respýblika boiynsha sońǵy 3 jyl boiy kósh basynda keledi. Byltyr aimaqta 21753 sábi dúniege kelgen.
