Mańǵystaýdyń shól dalasynan bir top aqqý tabyldy. En dalada shólden álsiregen qustardy Boranqul aýylynyń turǵyny baiqaǵan, dep xabarlaidy "Ult aqparat".
Ol aqqýlardy úiine ákelip, sýarmaq bolǵanymen olar adam qolynan sý ishpepti. Qustarǵa mamannyń kómegi keregin túsingen turǵyn dereý quzyrly organdarǵa habar berdi. 10 aqqýdyń 4-eýi óz betinshe ushyp ketken. Taǵy 3-eýi shólge shydamapty. «Qyzylsai» memlekettik óńirlik tabiǵi parkiniń inspektorlary qalǵan 3 aqqýdy Aqtaý qalasyna ákelip, «Qarakól» kóline jiberdi.
"Jol boiy sý shashyp aqqýlardyń jaǵdaiyn qarap otyrdyq. Tamaqtandyryp, sý berip. Tabiǵatta kómegin tigizgendei jol boiy jańbyr sirkirip turdy. Kelgen aqqýlardyń densaýlyǵy men kóńil-kúii jaqsy", - deidi Qyzylsai memlekettik óńirlik tabiǵi parki "Kóleńkeli" qaýmalynyń basshysy Izjan Qalqanov.
