Mańǵystaý oblysynda salymshylarǵa 9 mlrd teńgeden astam shyǵyn keltirgen Sax Invest qarjy piramidasyna qatysty qylmystyq is boiynsha tergeý jalǵasyp jatyr. Bul týraly oblystyq Ekonomikalyq tergep-tekserý departamenti málimdedi, dep habarlaidy ult.kz.
ETD Tergeý basqarmasynyń basshysy Samat Isabekovtiń aitýynsha, 2026 jyldyń alǵashqy jartyjyldyǵynda departament óndirisinde 27 qylmystyq is bolǵan. Onyń 10-y boiynsha tergeý aiaqtalyp, toǵyz is sotqa joldanǵan. Aiaqtalǵan qylmystyq ister boiynsha keltirilgen jalpy shyǵyn kólemi 1,63 mlrd teńgeden assa, tárkilengen múlikti qosa eseptegende 887,4 mln teńgege jýyq zalal ótelgen.
Eń iri isterdiń biri – Sax Invest qarjy piramidasynyń qyzmetine qatysty tergeý. Lada.kz málimetinshe, 2018–2022 jyldar aralyǵynda onyń uiymdastyrýshylary Aqtaý, Astana, Aqtóbe jáne Oral qalalaryndaǵy myńnan astam azamatqa baǵaly qaǵazdarmen operatsiialar júrgizý jáne Angoladaǵy almas óndirý jobasyna investitsiia salý arqyly joǵary tabys tabýǵa bolatynyn aityp, qarjy tartqan. Tergeý derekterine sáikes, salymdardyń jalpy kólemi 9 mlrd teńgeden asqan.
Atalǵan is boiynsha uiymdasqan qylmystyq toptyń segiz múshesi 6 jyldan 8 jylǵa deiin bas bostandyǵynan aiyryldy. Al tergeý nusqasy boiynsha qarjy piramidasynyń uiymdastyrýshysy 2024 jyldan beri halyqaralyq izdeýde. Sot úkimimen sottalǵandardyń múlki men tsifrlyq aktivteri tárkilenip, 208 jábirlenýshiniń azamattyq talap-aryzy qanaǵattandyryldy.
Ekonomikalyq tergep-tekserý departamentiniń málimetinshe, tergeý barysynda qylmystyq jolmen alynǵan qarajatty kazino arqyly zańdastyrý belgileri de anyqtalǵan. Alaida tergeý qupiiasyna bailanysty bul shema týraly tolyq aqparat jariialanǵan joq.
Sonymen qatar vedomstvo Aqtaý turǵynyna qatysty Telegram arqyly zańsyz onlain-kazino uiymdastyrý isi boiynsha tergeýdiń aiaqtalǵanyn habarlady. Ainalymy 3,1 mlrd teńgeni quraǵan zańsyz qyzmet úshin sot ony 5 jylǵa bas bostandyǵynan aiyryp, quny 52 mln teńgeden asatyn eki avtokólikti memleket kirisine tárkiledi.
Budan bólek, Astana Rich Village turǵyn úi kesheniniń aiaqtalmai qalǵan qurylysyna qatysty qylmystyq is, sondai-aq memlekettik satyp alýlar, áleýmettik nysandar qurylysy jáne oblys ákimdiginiń burynǵy jekelegen laýazymdy tulǵalarynyń qyzmetine bailanysty birneshe is boiynsha tergeý jalǵasyp jatyr.
Ekonomikalyq tergep-tekserý departamenti sotqa deiingi tergep-tekserý qupiiasyna bailanysty atalǵan qylmystyq isterdiń ózge mán-jailary jariialanbaitynyn málimdedi.
